Senat Salyq kodeksin jańa Konstıtýtsııaǵa sáıkestendiretin qujatty maquldady
ASTANA. KAZINFORM — Búgin Senattyń jalpy otyrysynda «Qazaqstan Respýblıkasynyń Salyq kodeksine ózgerister engizý týraly» Zań eki oqylymda qaralyp, maquldandy.
- Bárimizge belgili, Salyq kodeksi bul memleket pen salyq tóleýshiler arasyndaǵy qatynastardy retteıtin negizgi zańdar jıyntyǵy. Ol qandaı salyqtar bar ekenin, kim, qansha jáne qashan tóleý kerektigin belgileıdi jáne taraptardyń quqyqtary men mindetterin anyqtaıdy. Sol sebepten depýtattar bastamashy retinde atalǵan zańdy engizdi. Zań Qazaqstan Respýblıkasy Salyq kodeksiniń normalaryn 2026 jylǵy 15 naýryzdaǵy respýblıkalyq referendýmda qabyldanǵan Qazaqstan Respýblıkasy Konstıtýtsııasynyń erejelerine sáıkes keltirý maqsatynda ázirlendi, - dedi senator Bekbolat Orynbekov.
Atalǵan qujat:
- bir palataly Parlament – Quryltaıdyń, Qazaqstan Halyq Keńesin qurylýyna baılanysty ózgeristerdi;
- quqyqtyq termınologııany jetildirýge baǵyttalǵan redaktsııalyq túzetýlerdi kózdeıdi;
- Astana qalasynyń erekshe mártebesine sáıkes, aýmaq ataýlaryn kórsetýde basymdyqpen rettelgen;
- budan bólek, «Qazaqstan Respýblıkasynyń Konstıtýtsııalyq Soty týraly» Zańnyń 40-shy babyna engizilgen ózgeristerge sáıkes, Konstıtýtsııalyq Sotqa júginý úshin qarastyrylǵan memlekettik baj tólemi Salyq kodeksinen de alynyp tastaldy.
- Jalpy alǵanda, ózgerister salyq tóleýshiler úshin jańa salyqtar, stavkalar nemese mindettemeler engizýdi kózdemeıdi. Onyń maqsaty - Salyq kodeksin jańa Konstıtýtsııa normalarymen úılestirý jáne memlekettik ınstıtýttardyń jańa modelin quqyqtyq turǵydan bekitý. Zańdy qabyldaý teris áleýmettik-ekonomıkalyq nemese quqyqtyq saldarlarǵa alyp kelmeıdi jáne memlekettik bıýdjetten qarjylyq shyǵyndardy talap etpeıdi, - dedi senator.
Eske salsaq, bul qujatty mamyr aıynda Parlamet Májilisi qabyldaǵan edi.
