Senat saqtandyrý máselelerine qatysty zań jobasyn Májiliske qaıtardy
ASTANA. QazAqparat - Búgin Parlament Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine saqtandyrý jáne saqtandyrý qyzmeti, baǵaly qaǵazdar naryǵy máseleleri boıynsha ózgerister men tolyqtyrýlar engizý týraly» zań jobasyn eki oqylymda talqylady. Qujatqa ózgerister engizilgendikten, zań jobasy Májiliske qaıtaryldy, dep habarlaıdy QazAqparat tilshisi.
«Zań jobasy Senat otyrysynda qaralyp, birinshi oqylymda qabyldandy. Ony talqylaý jáne ekinshi oqylymǵa daıyndaý barysynda oǵan ózgerister men tolyqtyrýlar engizý qajettigi týyndady», - dedi Ǵumar Dúısembaev.
Osy oraıda ulttyq qaýipsizdik organdaryna kólik quraldary ıeleriniń azamattyq-quqyqtyq jaýapkershiligin mindetti saqtandyrý sharttaryna qatysty saqtandyrý qupııasyn quraıtyn málimetterdi prokýrordyń sanktsııasynsyz alýǵa quqyq berý eskerilgen.
Sonymen qatar, aktýarıler birlestiginiń, saqtandyrý uıymdarynyń, saqtandyrý ombýdsmanynyń quqyqtyq jaǵdaıyn, qyzmetin retteýdi jáne olarǵa qoıylatyn talaptardy naqtylaý; saqtandyrý tólemderine kepildik berý qorynyń qyzmetine qatysty jekelegen normalardy naqtylaý; aktsıonerlik qoǵamdardyń esepterdi usyný merzimderin naqtylaý; zań jobasynyń redaktsııasyn jaqsartý men naqtylaý, zań tehnıkasynyń qaǵıdalaryna sáıkes keltirý bóliginde ózgerister men tolyqtyrýlar engizý qajettigi týyndady.
«Senattyń Qarjy jáne bıýdjet komıteti atalǵan zań jobasyna ózgerister men tolyqtyrýlardy QR Konstıtýtsııasy 61-babynyń 5-tarmaǵyna sáıkes, Parlament Májilisine jiberýdi usynady», - dep naqtylady senator Ǵ. Dúısembaev.
Jalpy otyrys barysynda palata depýtattary salystyrmaly kestege engizilgen túzetýlerge qoldaý bildirdi. Osydan keıin túzetýlerdi Májilis qaraýyna baǵyttaý týraly sheshim jasaldy.
