Senat ruqsat berý júıesin jeńildetýge arnalǵan zań jobasyn Májiliske qaıtardy
ANA. 17 naýryz. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda
«QR keıbir zańnamalyq aktilerine ruqsat berý júıesin jetildirý máseleleri boıynsha ózgerister men tolyqtyrýlar engizý týraly» zań jobasy ekinshi oqylymda talqylandy. Qujatqa birqatar túzetýler engizilgendikten, zań jobasy Májiliske qaıtaryldy.
Esterińizge sala keteıik, atalǵan zań jobasy ruqsat berý salasyndaǵy zańnamany odan ári jetildirýge arnalyp otyr. Memleket basshysy joldaýlarynda Úkimetke ákimshilik reforma sheńberinde bızneske túsetin ákimshilik júktemeni batyl azaıtý, ruqsat berý júıesin, eń aldymen lıtsenzııalaýdy, sertıfıkattaýdy, akkredıtteýdi odan ári ońaılatýdy tapsyrǵan bolatyn. Osy maqsatty júzege asyrý úshin atalǵan zań jobasy ázirlengen. Zań jobasymen 54 zańnamalyq aktige, onyń ishinde 5 kodeks pen 49 zańǵa ózgerister engiziledi. Engizilgen ózgerister jekelegen ruqsat berý qujattaryn berý jónindegi normalardy, artyq talaptardy, zańnamalyq aktiler normalarynyń arasyndaǵy qaıshylyqtardy alyp tastaýǵa septigin tıgizedi. Budan bólek, qujatta lıtsenzııa berý merzimin qysqartýǵa, qyzmet túrleriniń ataýlaryn ózgertý jolymen jekelegen qyzmet túrlerin lıtsenzııalaý jónindegi talaptardyń qoldanylý salasyn yqshamdaýǵa baǵyttalǵan normalar qamtylady. Zań jobasymen qoldanystaǵy 1 myń 15 ruqsat berý qujatynyń rásimderiniń 331-i nemese 30 paıyzy qysqartylady. Lıtsenzııalanatyn qyzmet túrleri sheńberinde qorshaǵan ortany qorǵaý men aýyl sharýashylyǵy salasyndaǵy sýbektiler aıasyn azaıtý kózdeledi. Budan bólek, ruqsat berý qujattaryn alýǵa baılanysty ýaqyt jáne qarajat shyǵyndaryn azaıtý maqsatynda ruqsat berý rásimderin jeńildetý kózdelip otyr. Atap aıtqanda «jalǵyz tereze» qaǵıdatyn barlyq memlekettik organdar qoldanatyn bolady. Sondaı-aq, lıtsenzııa berýdiń merzimi 30 kúnnen 15 kúnge deıin qysqartylady. Zań jobasy qabyldanǵannan keıin ruqsat berý qujatynyń aınalymy jylyna 800 myńnan astam danaǵa azaıatyndyǵy boljanyp otyr.
