Senat Reseıge Balqash torabyn berý sharttaryn qamtyǵan kelisimdi qabyldady
ASTANA. QazAqparat - Búgin Senattyń jalpy otyrysynda «Qazaqstan Respýblıkasynyń Úkimeti men Reseı Federatsııasynyń Úkimeti arasyndaǵy Qazaqstandyq Balqash torabyn berý sharttary jáne ony zymyran shabýyly týraly Reseı eskertý júıesinde odan ári paıdalaný tártibi týraly kelisimdi ratıfıkatsııalaý týraly» QR Zańy qabyldandy.
2014 jylǵy 2 jeltoqsanda Máskeýde jasalǵan Kelisim Qazaqstan aýmaǵynda ornalasqan Balqash torabyn Reseı tarapyna berý sharttaryn, ony odan ári paıdalaný tártibin aıqyndaıdy jáne Balqash toraby boıynsha 1994 jyly qabyldanǵan kelisimdi almastyratyn bolady.
Qujatqa sáıkes Reseıge paıdalaný úshin beriletin Balqash toraby Qazaqstannyń menshigi bolyp qala beredi, al ol jyljymaıtyn jáne jyljymaly múlikten jáne Balqash torabynyń ınfraqurylymy ornalasqan jer ýchaskelerinen turady. Bul rette ınfraqurylym men jer ýchaskeleri Reseıge tek nysanaly maqsatta paıdalanýǵa beriledi. Reseı tarapy Qazaqstannyń memlekettik jáne áskerı basqarý pýnktterine zymyran shabýyly týraly eskertý júıesinen jáne ǵarysh keńistigin baqylaý júıesinen aqparattar beredi. Reseı Balqash torabynyń jer ýchaskelerin Taraptardyń nemese úshinshi elderdiń ózge de jeke jáne zańdy tulǵalaryna paıdalanýǵa bere almaıdy. Kelisim toqtatylǵannan keıin Balqash toraby kelisimde kórsetilgen sharttar men merzimder boıynsha Qazaqstan tarapyna beriletin bolady.
Qujat jyljymaly jáne jyljymaıtyn múlikti qabyldaý men berý jáne ony túgendeý tártibin retteıdi. Zalaldy óteý, daýlar men kelispeýshilikterdi sheshý tártibi týraly erejeler de belgilengen. Kelisimdi ratıfıkatsııalaý Qazaqstandyq Balqash torabyn odan ári paıdalaný máselesin zańnamalyq retteýge múmkindik beredi, sondaı-aq ony paıdalanýda jańa tásilderdi ázirleýge qyzmet etedi.
Parlament qabyldaǵan zań Memleket basshysynyń qol qoıýyna joldanady.
