Senat «Prokýratýra týraly» Konstıtýtsııalyq zańdy qabyldady

ASTANA. QazAqparat – QR Parlamenti Senaty «Prokýratýra týraly» Konstıtýtsııalyq zańdy qabyldady, dep habarlaıdy QazAqparat tilshisi.

Zań jobasyn Senat depýtattaryna QR Bas prokýrorynyń orynbasary Áset Shyndalıev tanystyrdy.

«Birinshi taraýda prokýratýranyń maqsattary men mindetteri bekitildi. «Prokýratýra óz mindetterin adamdy, onyń ómirin, quqyqtary men bostandyqtaryn qorǵaý úshin júzege asyrady» delingen. Mundaı bap zańnamada alǵash ret berilip otyr. Sonymen qatar, jobada barlyq qyzmet baǵyttary boıynsha prokýrorlardyń quzyretteri tizbelep berilgen. Bul eń aldymen azamattar úshin mańyzdy. Olar prokýrordyń zańda bar quqyqtary men mindetterin tolyq biletin bolady. Ekinshiden, júıeli túrde adam quqyqtaryn qorǵaý úshin prokýrorlar qandaı mindetter atqarýǵa tıis ekeni naqty jazylyp otyr», - dedi Áset Shyndalıev.

Onyń málimeti boınysha, zań jobasynda «tekserý barysynda taldaý nemese aktilerge baǵalaý jasaǵan kezde málimetter men qujattardy aldyrýǵa, laýazymdy, basqa da adamdardan jaýap alýǵa, saraptama taǵaıyndaýǵa quqyly» dep kórsetilgen.

«Sonymen qatar, zańsyz aktilerdi toqtata turýǵa, zańsyz tyıym salynsa, shekteý qoıylǵan bolsa, olardyń kúshin joıýdy talap etýge, zańsyz ustalǵan adamdardy dereý bosatýǵa mindetti.

Zań jobasynda «Adam quqyqtaryn qorǵaý boıynsha ózara is-qımyl» degen bap engizildi. Bul bapta Adam quqyǵy jónindegi ókildiń memlekettik organdarmen jáne uıymdarmen birlesip jumys isteý negizderi bektilgen», - dedi Bas prokýrordyń orynbasary.

Senat depýtattary atalǵan konstıtýtsııalyq zańdy maquldaý týraly sheshim qabyldady.