Senat poshta salasynda taǵaıyndalǵan operator ınstıtýtyn engizetin qujatty qabyldady
ASTANA. QazAqparat - Búgin Parlament Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine Qazaqstan Respýblıkasynyń poshta týraly zańnamasynyń normalaryn Dúnıejúzilik poshta odaǵy aktileriniń normalarymen birizdendirý máseleleri boıynsha ózgerister men tolyqtyrýlar engizý týraly» QR Zańy qabyldandy.
Atalǵan qujat Elbasynyń Joldaýyndaǵy elimizdiń tranzıttik áleýetin, logıstıkalyq kórsetiletin qyzmetter men halyqaralyq saýdany damytý salasynda qoıǵan mindetterin oryndaý aıasynda ázirlengen bolatyn.
Qujattyń mindeti taǵaıyndalǵan operator ınstıtýty jáne «poshta baılanysynyń ámbebap qyzmetteri» sekildi uǵymyn engizý arqyly elimizdiń poshta baılanysy salasyna jańa model engizý bolyp tabylady.
«2011 jyly taǵaıyndalatyn operator týraly sheshim qabyldanyp, Qazaqstan alty aıdyń ishinde taǵaıyndalǵan operatordy aıqyndaýy kerek bolatyn. Biraq ol atqarylmaǵan. Óıtkeni, bul máselemen sol kezdegi Kólik jáne kommýnıkatsııa mınıstrligi aınalysty, alaıda eki márte joba daıyndaǵanymen Ádilet mınıstrligi jobalardy qoldamaǵan. Sol sebepti bul máseleni ulttyq zańnamaǵa ózgeris engizý arqyly sheshý týyndady. Al taǵaıyndalǵan operatordy aıqyndaýǵa qatysty máseleni Qazaqstannyń sheshpeýine baılanysty Dúnıejúzilik poshta odaǵy atynan EMS kooperatıvi 2014 jyldyń 1 shildesinen bastap barlyq múshelik jeńildikterdi Qazaqstanǵa berýdi toqtatatyny týraly Ulttyq poshta operatoryn habardar etken. Bul Qazaqstan úshin EMS kooperatıviniń halyqaralyq júıesine qol jetkizýden aıyrýǵa ákep soǵady», - dedi zań jobasyna bastama jasaǵan Májilis depýtaty Shavhat Ótemisov. Onyń aıtýynsha, 2008 jyly Dúnıjúzilik poshta odaǵynyń jarǵysy «taǵaıyndalǵan operator» termınimen tolyqtyrylǵan bolatyn. Bul sanatqa Dúnıejúzilik poshta odaǵyna múshelikke kez kelgen memlekettik nemese memlekettik emes uıym kire alady. «Olar óz aýmaǵynda poshta qyzmetin júzege asyrýdy qamtamasyz etip, Dúnıejúzilik poshta odaǵynyń aktileri men týyndap otyrǵan ózgeriske qatysty mindetterdi oryndaýy tıis»,- deıdi Sh. Ótemisov. Budan bólek, depýtattyq korpýs poshta operatorynyń qoljetimdiligin, jedeldilik pen udaıylyqtyń qajetti deńgeıin uıymdastyrýdy zań deńgeıinde qamtamasyz etýdi usynyp otyr.
