Senat poshta qyzmetin jetildirýge baǵyttalǵan zańdy maquldady
ASTANA. KAZINFORM – Búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine baılanys qyzmetterin kórsetý, memlekettik satyp alý, kólik jáne poshta máseleleri boıynsha ózgerister men tolyqtyrýlar engizý týraly» Zańy eki oqylymda qaralyp, maquldandy.
Zańnyń maqsaty - poshta, memlekettik qyzmetter kórsetý, saýda maqsatynda teńizde júzý salalaryndaǵy zańnamany jetildirý, sondaı-aq memlekettiń aqparattyq qaýipsizdigin nyǵaıtý.
Qazir 2054 aýyldyq poshta bólimshesi jumys isteıdi, olar qolma-qol aqsha, hattardy, gazetterdi jetkizýdi, tólemderdi qabyldaýdy qamtamasyz etedi jáne barlyq 6209 aýyldy eldi mekenderdiń turǵyndaryna memlekettik qyzmet kórsetedi.
- Poshta salasyndaǵy zańnamany jetildirý aıasynda poshta baılanys naryǵyn, onyń ishinde elektrondyq saýdany damytýǵa, poshta baılanysynyń sýbsıdııalanatyn ámbebap qyzmetterin qysqartýǵa, poshta salasyndaǵy ýákiletti organnyń qyzmetin bıýrokratııadan aryltýǵa baǵyttalǵan túzetýler kózdelgen. Memlekettik qoldaýdyń barlyq sharalaryn kórsetýdiń tsıfrlandyrylǵan, ataýly ári proaktıvti sıpatyna saı, halyqtyń qajettilikterin ýaqtyly qanaǵattandyrýdy kózdeıtin «Áleýmettik ámııan» jobasy zańnamalyq deńgeıde bekitiledi. Bul tsıfrlyq tehnologııalardy engizý jáne qolma-qol aqsha paıdalanýyn shekteý arqyly áleýmettik kómek quraldaryn sebepsiz paıdalanýdy azaıtýǵa jáne olardyń qadaǵalanýyn qamtamasyz etýge yqpal etedi. Atalǵan joba pılottyq rejımde 2024 jyldyń 1 qarashasynan elimizdiń barlyq óńirlerinde iske asyrylyp jatyr, - dedi senattr Álibek Náýtıev.
Qujatta poshta operatorlarynyń qyzmetteri paıdalanýshylarǵa yńǵaıly bolý úshin PIN-kodty terý nemese QR-kodty oqý arqyly adresattyń kelisimin ala otyryp, poshta jóneltilimin úshinshi tulǵalarǵa tapsyrý múmkindigin qarastyrý eskerilgen. Ulttyq operatorǵa, ıaǵnı «Qazposhta» aktsıonerlik qoǵamyna densaýlyq saqtaý salasyndaǵy zańnamanyń talaptaryna sáıkes dárilik zattar men medıtsınalyq buıymdardy tasymaldaý jáne saqtaý quqyǵy beriledi.
Onyń aıtýynsha, qazaqstandyq kadrlardyń tapshylyǵyna baılanysty «Saýda maqsatynda teńizde júzý týraly» zańǵa sheteldikterge kapıtan, kapıtannyń aǵa kómekshisi jáne aǵa mehanık laýazymdaryna ornalasýǵa tyıym salýdy odan ári toqtata turý bóliginde ózgerister engiziledi.
Respýblıkamyzdyń kemelerinde komandalyq quram laýazymdarynda 585 teńizshi, onyń ishinde 317 qazaqstandyq jáne 268 sheteldik teńizshi jumys isteıtinin eskersek, bul norma komandalyq quramdy qazaqstandyq kadrlarmen tolyqtyrǵanǵa deıin keme kompanııalarynyń qajettilikterin jabýǵa múmkindik beredi.
- Budan bólek, «Memlekettik apparattyń qyzmetin bıýrokratııadan aryltý jónindegi sharalar týraly» Qazaqstan Respýblıkasy Prezıdentiniń Jarlyǵyn iske asyrý maqsatynda «Poshta týraly» zańǵa ýákiletti organnyń quzyretin naqtylaýǵa baǵyttalǵan ózgerister men tolyqtyrýlar engiziledi, - dedi depýtat.
Budan buryn habarlanǵandaı, jaqynda Memleket basshysy «Qazposhta» AQ basqarma tóraǵasy Ásel Janasovany qabyldady.