Senat polıtseılerdiń quqyqtyq qorǵalýyn arttyrýǵa arnalǵan qujatty qabyldady

NUR-SULTAN. QazAqparat – Senattyń jalpy otyrysynda «Qazaqstan Respýblıkasynyń keıbir zańnamalyq aktilerine quqyq qorǵaý qyzmetin ótkerý tártibin jetildirý, quqyq qorǵaý organdary, arnaýly memlekettik organdar qyzmetkerleriniń jáne áskerı qyzmetshilerdiń quqyqtyq jáne áleýmettik qorǵalýy men jaýaptylyǵyn arttyrý, vedomstvoaralyq úılestirý, ishki ister organdarynyń derbestigi, jekelegen qylmystyq quqyq buzýshylyqtar úshin jaýaptylyqty kúsheıtý jáne qarý aınalymy máseleleri boıynsha ózgerister men tolyqtyrýlar engizý týraly» Zańy eki oqylymda qaralyp, qabyldandy, dep habarlaıdy QazAqparat tilshisi.

Zań jobasy quqyq qorǵaý qyzmetin quqyqtyq retteýdi jetildirý, qarý aınalymy salasyndaǵy talaptardy kúsheıtý, polıtseılerdiń quqyqtyq qorǵalýyn arttyrý, sheshimder qabyldaý kezinde kúsh qurylymdary arasyndaǵy tıimdi úılestirýdi jáne kúsh qurylymdarynyń derbestigin qamtamasyz etý, sondaı-aq olardyń basshylarynyń jaýapkershilik deńgeıin arttyrý maqsatynda ázirlendi.

Senator Andreı Lýkınniń aıtýynsha, qujatta quqyq qorǵaý qyzmeti týraly zańnamany jetildirý, sondaı-aq quqyq qorǵaý organdary qyzmetkerleriniń quqyqtyq jáne áleýmettik qorǵalý deńgeıin arttyrý eskerilgen.

Zań jobasynda mynadaı túzetýler engiziledi:

- konkýrstyń kezeńderi azaıyp, konkýrstan tys irikteý boıynsha talaptar kúsheıtiledi;

- arnaýly memlekettik organdardy jáne áskerı qyzmetshilerdi quqyq qorǵaý organdaryna aýystyrý engiziledi;

- vedomstvolyq joǵary oqý oryndaryna tájirıbeli ǵalymdar men praktıkterdi qabyldaý ońaılatylady;

- qyzmetkerlerdiń jumysyn baǵalaý, tártiptik praktıka jáne kótermeleý, sondaı-aq merziminen buryn ataqtar berý tártibi retke keltiriledi;

- quqyq qorǵaý organdary qyzmetkerleriniń jalaqysyn ındeksteý boıynsha (2025 jyldyń 1 qańtarynan bastap) túzetýler engiziledi;

- qaza tapqan nemese múgedektik alǵan qyzmetkerlerdiń balalarynyń joǵary bilim alýyna memlekettik granttardy kózdeıtin túzetýler engiziledi;

- qarý aınalymy salasynda retteý jónindegi talaptar kúsheıtiledi;

- kúsh qurylymdarynyń sheshimder qabyldaýdaǵy derbestigin qamtamasyz etý jáne olardyń basshylarynyń jaýaptylyq deńgeıin arttyrý.

- áleýmettik sıpattaǵy tótenshe jaǵdaıdy joıý kezinde quqyq qorǵaý jáne arnaýly organdardy paıdalaný, Qarýly kúshterdi tartý, Qarýly kúshterdiń arnaýly quraldardy, qarýdy qoldaný jáne áskerı tehnıkany paıdalaný erekshelikteri reglamentteledi.