Senat pen máslıhat depýtattarynyń saılaýyn ótkizýge 450 mln.-ǵa jýyq teńge bólindi

ASTANA. QazAqparat  - Aǵymdaǵy jyly ótetin depýtat saılaýlaryna 400 mıllıonnan astam qarjy jumsalady. 

Bul týraly búgin QR Ortalyq saılaý komıssııasynyń ashyq otyrysynda komıssııa tóraǵasynyń orynbasary Vladımır Foos málim etti, dep habarlaıdy QazAqparat.

«Aǵymdaǵy jylǵy Parlament Senatynyń kezekti saılaýy men shyǵyp qalǵandardyń ornyna máslıhat depýtattary saılaýyn ótkizý bıýdjeti 446 mln. 694 myń teńgeni quraıdy», - dedi ol.

Onyń atap ótýinshe, aǵymdaǵy jyldyń 26 naýryzynda ótetin shyǵyp qalǵandardyń ornyna máslıhat depýtattary saılaýyn ótkizýge 12 oblysty qarjylandyrý úshin 7 aqpan kúni 200 mln. 143 myń teńge bólingen.

«Bıýdjet qarjysyn jumsaýǵa barynsha jaýapkershilikpen qaraýdy ótinemin. Oblystyq ákimdik býhgalterlerimen bıýdjetti der ýaqytynda oryndaýdy qarastyryńyzdar jáne bıýdjet qarjysyn maqsatsyz paıdalaný boıynsha qatelikterge boı aldyrmańyzdar. Býhgalterlik qujattardy der ýaqytynda rásimdeý qajet. «Saılaý týraly» zańǵa sáıkes, osy maqsat úshin jergilikti atqarýshy organdarda ashylatyn esepshot arqyly respýblıkalyq bıýdjet aqshasymen qarjylandyrylǵanymen atalǵan esepshotqa túsken qarjyǵa aýmaqtyq saılaý komıssııalary bılik júrgizetindigin esten shyǵarmaýlaryńyzdy ótinemin. Tóraǵalar qarjylyq qujattardyń qarjylyq máseleler boıynsha  sheshimdermen sáıkestigine jaýap beredi», - dedi Foos.