Senat ózindik ereksheligi bar taýarlarmen baılanysty qujatty Májiliske qaıtardy
Senator Qaırat Qojamjarovtyń aıtýynsha, zań jobasynyń maqsaty – ulttyq qaýipsizdik pen qorǵanys qabyletin qamtamasyz etý, halyqaralyq mindettemelerdi oryndaı otyryp, «ózindik ereksheligi bar taýarlardy» baqylaýdyń halyqaralyq rejımderine sáıkestendirý. Sondaı-aq qosarlanǵan jáne áskerı maqsattaǵy taýarlar salasynda qyzmet kórsetýdiń ulttyq júıesin jetildirýge baǵyttalǵan.
Atap aıtqanda, zań jobalary eldiń zańnamasyna qosarly ári áskerı maqsattaǵy taýarlar men kórsetiletin qyzmetterdiń eksporty kezindegi táýekelderdi baǵalaý krıterıılerin jáne osy saladaǵy ózge de erekshelikterdi engizýdi qarastyrady. Bul normalar naqty taýarlardy baqylaýdyń jáne osy táýekelderdi joıýdyń tıimdi tetigin qurýdy kózdeıdi.
Odan bólek, zań jobalarynda memlekettik organdardyń quzyretin naqtylaý, memlekettik organdarmen jáne uıymdarmen aqparattyq ózara is-qımyl jasaý tártibi, zańnamany jáne basqa da normalardy buzǵany úshin jaýapkershilikti kúsheıtý týraly erejeler de bar.
«Májilis maquldaǵan zań jobasyna ózgerister men tolyqtyrýlar engizý qajet. Basty zań jobasy boıynsha ózindik ereksheligi bar taýarlarǵa kedendik baqylaýdy Memlekettik shekara perımetrinde ornatý, shet memleketter nemese uıymdaryna tıesili áskerı maqsattaǵy taýarlardy shyǵarý merzimin engizý, Úkimettiń shekteýge baǵyttalǵan quzyretin naqtylaý eskerilgen», - dedi Qaırat Qojamjarov.
Sonymen qatar «Qazaqstan Respýblıkasynyń keıbir zańnamalyq aktilerine ózindik ereksheligi bar taýarlardy baqylaý máseleleri boıynsha ózgerister men tolyqtyrýlar engizý týraly» ilespe zań jobasyn ekinshi oqylymda qaraý barysynda «112» Biryńǵaı kezekshi-dıspetcherlik qyzmetin qurýǵa baılanysty máseleler bóliginde túzetýler engizý usynyldy.
Senat depýtattary zań jobalarynda belgilengen jańashyldyqtardy kontseptýaldy túrde qoldaı otyryp, olarǵa óz tolyqtyrýlaryn engizdi. Soǵan baılanysty zań jobalaryn Májiliske jiberý týraly sheshim qabyldady.
