Senat óz qyzmetkeri, tanymal jýrnalıst O. Joldybaıdy qurmetpen zeınetkerlikke shyǵaryp saldy
ASTANA. 10 qyrkúıek. QazAqparat - Parlament Senatynyń Apparatynda tanymal jýrnalıst,
osy Palata Apparatynyń redaktsııalyq-baspa bólimi meńgerýshisiniń orynbasary bolyp qyzmet atqarǵan Orynbek Joldybaıdyń zeınetkerlikke shyǵýyna oraı is-shara ótti. Apparattyń bólim meńgerýshileri jınalǵan bul basqosýda Senat Apparatynyń basshysy Qaırat Nurpeıisov zeınetkerlik jasqa jetip, birjola shyǵarmashylyq jumysqa kiriskeli turǵan Orynbek Joldybaıǵa áriptesteri atynan izgi tilegin bildirdi.
O.Joldybaıǵa jemisti qyzmeti úshin QR Parlamenti Senaty tóraǵasynyń Qurmet gramotasy tabys etildi. Sondaı-aq Apparat basshysynyń quttyqtaý haty men syı-sııapat usynyldy.
Apparat basshysynyń orynbasary Serik Sydyqov óz sózinde Orynbek Endibaıulynyń uzaq jyldar boıy memlekettik qyzmette eńbek etip, aýdarma salasyn jetildirýge, zańdardyń memlekettik tilde durys jazylýyna úles qosqanyn atap ótti.
Orynbek Joldybaı 1949 jyly Ońtústik Qazaqstan oblysynyń Aşysaı kentinde dúnıege kelgen. 1977 jyly S.M.Kırov (qazirgi Ál-Farabı) atyndaǵy Qazaq memlekettik ýnıversıtetiniń jýrnalıstıka fakýltetin bitirgen. Qazaq memlekettik teleradıo komıtetinde, «Aqıqat» jýrnalynda, Qazaqstan Prezıdenti Ákimshiligi men Mınıstrler kabınetiniń Apparattarynda qyzmet jasady. 1996 jyldan beri Senat Apparatynda eńbek etip keldi.
Ol Jazýshylar jáne Jýrnalıster odaǵynyń múshesi, fılologııa ǵylymdarynyń kandıdaty. QR Mádenıet qaıratkeri, Jýrnalıster odaǵy syılyǵynyń laýreaty O.Joldybaıdyń «Zamana kelbeti», «Ýaqyt lebi», «Ótken jyldar órnegi», «Jan syrym», «Akademık Rahmanqul Berdibaıdyń zertteýlerindegi túrkishildik saryndary» atty kitaptary jaryq kórgen.
