Senat otyrysynyń kún tártibi kelisildi
ASTANA. QazAqparat - 8 qazanda bolatyn Senat otyrysynda Palata on eki zań jobasyn qaraýdy josparlady.
Senat Tóraǵasy Qasym-Jomart Toqaev jáne Palata Bıýrosynyń músheleri qabyldaǵan Qaýlyǵa sáıkes, depýtattar nazaryna Kásipkerlik kodeksiniń jobasy, zańnamaǵa kásipkerlik máseleleri boıynsha ilespe ózgerister men tolyqtyrýlar (birinshi oqylym) jáne «Qazaqstan Respýblıkasynyń memlekettik rámizderi týraly» konstıtýtsııalyq zańǵa túzetýler shyǵarylatyn bolady. Zańnamaǵa mádenıet jáne tarıhı-mádenı mura jáne úkimettik emes uıymdardyń qyzmeti máseleleri boıynsha ózgerister men tolyqtyrýlardy birinshi oqylymda talqylaý josparlandy.
Palata otyrysyna sondaı-aq «Ǵylymı jáne (nemese) ǵylymı-tehnıkalyq qyzmet nátıjelerin kommertsııalandyrý týraly», «Aýyl sharýashylyǵy kooperatıvteri týraly» zań jobalary, sondaı-aq birinshi oqylymda zańnamaǵa tıisti túzetýler de engiziledi. Birinshi oqylymda Jer kodeksine ózgerister men tolyqtyrýlar jobasyn da talqylaý josparlanady.
Senatorlar sonymen qatar zańnamaǵa quqyq qorǵaý organdarynyń qyzmetin jáne quqyq qorǵaý qyzmetin ótkerý tártibin jetildirý, sondaı-aq halyqty áleýmettik qorǵaý máseleleri boıynsha (birinshi oqylym) túzetýler engizý týraly birqatar zań jobalaryn qaraıdy.
Odan basqa, Bıýroda taıaýda Májilisten túsken on tórt zań jobasy Senattyń turaqty komıtetterine bólindi.
Halyqaralyq qatynastar, qorǵanys jáne qaýipsizdik komıteti «Qoǵamdyq keńester týraly», «Aqparatqa qol jetkizý týraly» zań jobalary jáne zańnamaǵa osy zań jobalary boıynsha ilespe túzetýler boıynsha bas komıtet bolyp belgilendi.
Konstıtýtsııalyq zańnama, sot júıesi jáne quqyq qorǵaý organdary komıteti «Qazaqstan Respýblıkasynyń keıbir zańnamalyq aktilerine jergilikti polıtsııa qyzmetiniń jumysy máseleleri boıynsha ózgerister men tolyqtyrýlar engizý týraly» zań jobasymen shuǵyldanady.
Ekonomıkalyq saıasat, ınnovatsııalyq damý jáne kásipkerlik komıtetine «Ózin-ózi retteý týraly» zań jobasy men oǵan baılanysty ilespe túzetýler tapsyryldy.
Qarjy jáne bıýdjet komıteti zańnamaǵa ońaltý jáne bankrottyq máseleleri, azamattarǵa raqymshylyq jasaý máseleleri, jeke tulǵalardyń tabystary men múlkin deklaratsııalaý máseleleri, bıýdjet zańnamasyn jetildirý máseleleri boıynsha túzetýler jobalary, sondaı-aq «Qazaqstan Respýblıkasyndaǵy saılaý týraly» konstıtýtsııalyq zańyna ózgerister men tolyqtyrýlar jobasy boıynsha bas komıtet bolyp belgilendi.
«Mindetti áleýmettik medıtsınalyq saqtandyrý týraly» zań jobasy jáne zańnamaǵa ilespe túzetýler jobasy boıynsha Áleýmettik-mádenı damý jáne ǵylym komıteti aınalysatyn boldy.
Bas komıtetter Senattyń barlyq turaqty komıtetteriniń usynystaryn pysyqtap, osy zań jobalary boıynsha Palatanyń otyrystaryna tıisti qorytyndylar ázirleıdi.
