Senat otyrysynda Keden odaǵyna baılanysty 15 zań qabyldandy
A. Maýsymnyń 25-i. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda palata depýtattary Keden odaǵyna qatysty 15 zań jobasyn qabyldady.
Atalǵan zańdar shildeniń 1-inen bastap Keden odaǵy aýmaǵynda Keden kodeksiniń júzege asýyna, jáne Keden odaǵynyń naqty iske kirisýine baılanysty qabyldanyp otyr.
Atap aıtqanda, palata depýtattary Keden odaǵyna múshe memleketterdiń zııatkerlik menshik nysandarynyń biryńǵaı kedendik tizilimi týraly, kedendik baqylaýdyń belgili bir nysandaryn qoldanýynan bosatý týraly, keden aýmaǵy arqyly jolaýshylardy tasymaldaýdy júzege asyratyn halyqaralyq tasymaldaýdyń kólik quraldaryn paıdalaný erekshelikteri týraly, halyqaralyq poshta jóneltilimderimen jiberiletin taýarlarǵa qatysty kedendik operatsııalardyń ereksheligi týraly, erkin qoımalar men erkin qoımanyń kedendik rásimi týraly, keden aýmaǵyndaǵy erkin ekonomıkalyq aımaqtar jáne erkin kedendik aımaqtardyń kedendik rásimi týraly kelisimderdi qabyldady.
«Birinshi kelisim negizinde keden odaǵynyń kedendik shekarasy arqyly taýarlardy ótkizý kezinde keden organdary zııatkerlik menshik quqyqtaryn qorǵaý jóninde sharalar qabyldanatyn zııatkerlik nysandaryn biryńǵaı kedendik tizilimin júrgizý tártibin belgileıdi. Ótinishti qaraý jáne zııatkerlik menshik nysandaryn biryńǵaı tizilimge engizý týraly sheshimder qabyldaý Keden odaǵyna múshe memleketterdiń ózara is-qımyl reglamentine sáıkes júzege asyrylady», dedi zań jobalary boıynsha baıandaǵan QR Qarjy mınıstri Bolat Jámishev.
Budan bólek, kelisimderdiń bir bóligi elimizdegi belgili joǵary laýazym ıeleriniń júkterin kedendik tekserýlerden bosatýǵa baǵyttalǵan. «Atap aıtqanda, kedendik shekaradan qyzmettik mindetterin nemese depýtattyq ókildikterin oryndaýǵa baılanysty ótetin bolsa tizilimde kórsetilgen laýazym ıeleriniń jeke júkterin kedendik tekserip qaraýdan bosatylady», dedi B. Jámishev.
Sonymen birge, qabyldanǵan kelisimniń bir parasy Qazaqstan men Reseı arasyndaǵy Keden odaǵyn qalyptastyrý sheńberinde halyqaralyq sharttardy qoldanýdy, jeke tulǵalardyń jeke paıdalanýǵa arnalǵan taýarlaryn kedendik shekara arqyly ótkizýge baılanysty operatsııalar jasaý tártibin, keden odaǵy aýmaǵynda erkin (arnaıy, erekshe) ekonomıkalyq aımaqtar jáne erkin kedendik aımaqtyń kedendik rásimi jónindegi kelisimderdi qamtıdy.
«Ekinshi kelisim keden odaǵyn qurý aıasynda halyqaralyq kelisimderdi qoldaný týraly RF men Qazaqstan arasyndaǵy qujatqa sáıkes, birinshiden 2010 jylǵy shildeniń 1-inen bastap Qazaqstan men Reseı arasynda Keden odaǵynyń Keden kodeksi men ony iske asyrýǵa baǵyttalǵan basqa kelisimde kúshine enedi. Osylaısha, Qazaqstan men Reseı terrıtorııalary Keden odaǵynyń biryńǵaı kedendik aýmaǵy bolyp sanalady. Bul rette osy kelisimge sáıkes, «keden odaǵynyń taýary» degen uǵymy engiziledi. Oǵan - tolyǵymen kedendik odaqta óndirilgen atýarlar, úshinshi elderden ımportttalǵan shıkizattardan óndirilip, Kedendik odaq taýary mártebesine ıe bolǵan taýarlar, úshinshi elderden ımporttaý barysynda keden baj salyǵy tolyǵymen tólengen taýarlar jatady», dedi zań jobalary boıynsha baıandama jasaǵan Ekonomıkalyq damý jáne saýda mınıstri Janar Aıtjanova. Onyń aıtýynsha, endigi kúni Keden odaǵy komıssııasynyń barlyq sheshimderi Qazaqstan men Reseı arasynda konsensýstyq tetik arqyly sheshimin tabady. Bundaı konsensýstyq tetik tek Memleket basshylarynyń deńgeıinde ǵana qoldanylady.
Parlament qabyldaǵan zań toptamalary Elbasynyń qol qoıýyna jiberildi.
