Senat otyrysyna qylmystyq, qylmystyq-protsestik jáne qylmystyq atqarý kodeksteriniń jobalary shyǵarylady
ASTANA. 26 mamyr. QazAqparat - Qasym-Jomart Toqaevtyń tóraǵalyq etýimen ótken Qazaqstan Respýblıkasy Parlamenti Senaty Bıýrosynyń otyrysynda Palatanyń 30 mamyrda bolatyn kezekti jalpy otyrysynyń kún tártibi qaraldy.
Prezıdenttiń usynýyna sáıkes, senatorlar Qazaqstan Respýblıkasy Joǵarǵy Sotynyń sýdıalaryn qyzmetten bosatý jáne saılaý týraly máselelerdi qaraıdy. Bıýro Konstıtýtsııalyq zańnama, sot júıesi jáne quqyq qorǵaý organdary komıtetine Memleket basshysy usynǵan kandıdattardy talqylaýdy jáne olar boıynsha qorytyndy ázirleýdi tapsyrdy.
Senat otyrysyna Qylmystyq, Qylmystyq-protsestik jáne Qylmystyq atqarý kodeksteriniń jobalary birinshi oqylymda qaraýǵa shyǵarylady. Sonymen qatar, birqatar zańnamalyq aktilerge qylmystyq zańnamany jetildirý máseleleri boıynsha túzetýler jáne keıbir konstıtýtsııalyq zańdarǵa qylmystyq-protsestik zańnamany jetildirý máseleleri boıynsha túzetýler jobasy qaralatyn bolady. Odan basqa, joǵary palatanyń otyrysyna birqatar zańnamalyq aktilerge etıl spırti men alkogol óniminiń óndirilýin jáne aınalymyn memlekettik retteý máseleleri boıynsha ózgerister men tolyqtyrýlar engizý týraly zań jobalary birinshi oqylymǵa shyǵarylatyn boldy.
Bıýro otyrysynda Májilisten túsken zań jobalary bólinip berildi. Qarjy jáne bıýdjet komıteti «Qazaqstan Respýblıkasynyń keıbir zańnamalyq aktilerine bıýdjet zańnamasyn jetildirý máseleleri boıynsha ózgerister men tolyqtyrýlar engizý týraly» zań jobasyna bas komıtet bolyp belgilendi. Áleýmettik-mádenı damý jáne ǵylym komıteti «Kásiptik odaqtar týraly» jáne zańnamaǵa kásipodaqtar qyzmeti jáne eńbek qatynastaryn retteý máseleleri boıynsha ilespe zań jobalaryna bas komıtet boldy.
