Senat otyrysyna «Astana» halyqaralyq qarjy ortalyǵyn qurýǵa baǵyttalǵan zań jobasy shyǵarylady
ASTANA. QazAqparat - Búgin Parlament Senaty Qarjy jáne bıýdjet komıtetiniń keńeıtilgen otyrysy ótti. Onda depýtattar «Astana» halyqaralyq qarjy ortalyǵy týraly» Konstıtýtsııalyq zań jobasy qaraldy. Talqylaýdan soń komıtet qujatty palatanyń aldaǵy jalpy otyrysyna shyǵarý týraly sheshim qabyldady.
Zań jobasynyń maqsaty ozyq halyqaralyq tájirıbeni eskere otyryp, ortalyq qatysýshylarynyń qyzmeti úshin qolaıly ári tartymdy jaǵdaılardy qamtamasyz etetin «Astana» halyqaralyq qarjy ortalyǵyn qurý bolyp tabylady. Osyǵan baılanysty, zań jobasymen «Astana» halyqaralyq qarjy ortalyǵynyń naqty belgilengen shekarasy sheginde erekshe quqyqtyq rejım qurý qarastyrylady.
Ortalyqtyń aýmaǵynda jáne onyń qatysýshylaryna tek «Astana» halyqaralyq qarjy ortalyǵy» týraly zańnyń jáne onyń organdary aktileriniń normalary ǵana qoldanylady dep josparlanǵan. Ortalyq organdarynyń aktileri Anglııa jáne Ýels quqyǵynyń qaǵıdattary men normalaryna jáne álemniń jetekshi qarjy ortalyqtarynyń standarttaryna, birinshi kezekte Dýbaı halyqaralyq qarjy ortalyǵynyń normatıvtik qujattaryna negizdeledi. Budan bólek, «Astana» halyqaralyq qarjy ortalyǵynyń aýmaǵynda Ortalyqty basqarý jónindegi keńes, ortalyq qatysýshylarynyń qyzmetin baqylaý jáne qadaǵalaý jónindegi ýákiletti memlekettik organ, ıaǵnı Ulttyq banktiń vedomstvosy AHQO qatysýshylarynyń qyzmetin retteý jónindegi komıtet, ortalyq ákimshiligi, soty jumys isteıtin bolady. Munymen qosa, «Astana» halyqaralyq qarjy ortalyǵynyń quqyǵy Qazaqstannyń Konstıtýtsııasyna, zań aktilerine, organnyń aktilerine negizdeledi. «Astana» halyqaralyq qarjy ortalyǵynda arnaıy soty qurylady. Dýbaı halyqaralyq qarjy ortalyǵynyń sotyna uqsas bul sottyń quqyqtyq mártebesi táýelsiz jáne Qazaqstannyń sot júıesine kirmeıtin sot retinde aıqyndalyp otyr.
