Senat otbasy úlgisindegi balalar aýylynyń qyzmetine qatysty ózgertýlerdi qabyldady
ASTANA. 1 jeltoqsan. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda «Qazaqstan Respýblıkasynyń keıbir zańnamylyq aktilerine otbasy úlgisindegi balalar aýyly jáne jasóspirimder úıleri máseleleri boıynsha ózgerister men tolyqtyrýlar engizý týraly» QR zańy qabyldandy.
Atalǵan qujattyń quqyqtyq retteý nysanasy jetim balalar men ata-ana qamqorlyǵynsyz qalǵan balalardyń otbasy úlgisindegi balalar aýyldary men jasóspirimder úılerinde baǵyp-kútilýine, tárbıelenýine jáne bastaýyshtan bastap joǵary bilim alýyna baılanysty týyndaıtyn qoǵamdyq qatynastar bolyp tabylady.
Zań jobasy jetim balalar men ata-ana qamqorlyǵynsyz qalǵan balalarǵa arnalǵan balalar úıleri men mektep-ınternattardyń túlekteri qatarynan jasóspirimder úılerinde áleýmettik beıimdelýden ótý úshin adamdar sanattaryn keńeıtýge baǵyttalǵan. Bul rette tárbıeshi ana laýazymyna adamdardy irikteý kezindegi talaptardy ózgertý sharalary kózdeledi. Atap aıtqanda, shekti jasty 30-dan 27 jasqa deıin tómendetý arqyly tárbıeshi ana laýazymyna adamdardy irikteý kezindegi talaptar ózgertilip otyr. Bul jumys úshin tıisti bilimi bolýy da mindetteledi.
Budan bólek, jetim balalar men ata-ana qamqorlyǵynsyz qalǵan balalarǵa arnalǵan bilim berý uıymdarynyń tárbıelenýshileri qatarynan túlekterge 23 jasqa deıin áleýmettik beıimdelýden ótý kezeńinde turǵyn úı problemalaryn sheshýge múmkindik beretin derbes zańdy tulǵalar retinde jasóspirimder úılerin qurý qarastyrylady.
Osy sanattaǵy azamattardyń múliktik quqyqtaryn qorǵaý maqsatynda qosymsha normalar da engizilip otyr.
Parlament qabyldaǵan qujat Memleket basshysynyń qol qoıýyna jiberiledi.
