Senat otbasy úlgisindegi balalar aýyldary jáne jasóspirimder úıleri máseleleri jónindegi jobany Májiliske qaıtardy

Zań jobasynyń negizgi maqsaty jetim balalarǵa jáne ata-ana qamqorlyǵynsyz qalǵan balalarǵa arnalǵan bilim berý uıymdarynyń tárbıelenýshileri men túlekteriniń áleýmettik beıimdelýden ótýi, sondaı-aq olardyń quqyqtary men zańdy múddeleriniń qorǵalýy máselelerin jetildirý bolyp tabylady. «Jobany talqylaý barysynda otbasy úlgisindegi balalar aýylynyń jumys erekshelikterin jaqsy meńgergen osyndaı uıymdardyń ókilderinen tárbıeshi analardy jumysqa qabyldaý kezinde jasyna jáne bilimine qatysty shekteýlerdi alyp tastaý týraly naqty usynystar tústi. Buǵan qatysty biz respýblıkamyzda jumys isteıtin balalar aýyldarynyń áleýettik quramyn zerttegen bolatynbyz. Halyqaralyq tájirıbelerge súıensek, TMD elderinde, onyń ishinde Belarýs pen Reseıde tárbıeshi analardyń ortasha jasy 26-dan 48 jasqa deıin bolsa, Avstrııa, Polsha, Vengrııa sekildi elderde bundaı tárbıeshilerdiń ortasha jasy 24-46 aralyǵynda. Sondyqtan da, qoldanystaǵy zańnamadan mundaı shekteýlerdi alyp tastaýdy jón kórdik. Bul kadrlardyń jetispeýshiligi máselesin sheshýge yqpal etetin bolady», dedi jıyn barysynda baıandama jasaǵan QR Bilim jáne ǵylym vıtse-mınıstri Mahmetǵalı Sarybekov. Onyń aıtýynsha, qazirgi ýaqytta elimizde 610 bala tárbıelenip otyrǵan otbasy úlgisindegi 10 balalar aýyly bar eken. Onyń 7-eýi memlekettik bolsa, 3-eýi qorlar arqyly qarjylandyrylady. Sonymen qatar 27 jasóspirimder úılerinde balalar úıleriniń 1300-den astam bitirýshileri turyp jatyr.

Zań jobasyna Senat depýtattary birqatar ózgerister engizdi. Bulardyń basym kópshiligi redaktsııalyq naqtylaý sıpatynda bolyp tabylady.