Senat osy sessııadaǵy óz jumysyn aıaqtady
Jıyndy qorytyndylaǵan Senat spıkeri Qasym-Jomart Toqaev zań shyǵarýshy organ retinde palatanyń Úkimetpen birlesip, qoǵam ómirin túbegeıli jańǵyrtatyn baǵdarlamalardy tolyǵymen qamtamasyz etip kele jatqanyn atap ótti. «Sessııa barysynda palatanyń zań shyǵarmashylyq jumysy nátıjeli boldy. Elbasynyń strategııalyq reformalaryn jáne «100 naqty qadam» Ult josparyn iske asyrýǵa qajetti zańdar der kezinde qabyldandy. Senat aǵymdaǵy jylǵy qańtar-naýryz aılarynda Májilistiń jańa quramy jasaqtalǵanǵa deıingi ýaqyt ishinde Parlamenttiń zań qabyldaý fýnktsııasyn oıdaǵydaı oryndap shyqty. Osy kezeńde joǵary palata elimizdiń áleýmettik-ekonomıkalyq damýyna qajetti 57 zań jobasyn muqııat pysyqtap qabyldady. Jalpy alǵanda jyldyń basynan beri Parlamentte 73 zań qabyldandy», dedi Q. Toqaev.
Spıkerdiń aıtýynsha, Senat qyzmetiniń basqa da baǵyttary boıynsha, sonyń ishinde halyqaralyq saıasattyń kún tártibindegi ózekti máselelerine arnalǵan birqatar mańyzdy sharalar tabysty ótti. «Senat depýtattarynyń bastamashylyǵymen Eýrazııalyq ekonomıkalyq odaq jáne DSU jaǵdaıynda otandyq agrarlyq sektordyń básekege qabilettiligin arttyrýǵa arnalǵan mańyzdy Parlamenttik tyńdaý ótkizdi. Dúnıejúzilik parlamentter men din lıderleri ókilderiniń, saıasatkerlerdiń qatysýymen terrorızmniń aldyn alýdaǵy dinderdiń róline arnalǵan halyqaralyq konferentsııa da oıdaǵydaı ótti. Álemniń qyryq bir elinen kelgen eki júzden astam delegat terrorızm men ekstremızmdi aıyptap, álem qaýymdastyǵyn osy baǵyttaǵy kúreske kúsh biriktirýge shaqyrǵan málimdeme jasady. Forým delegattary Elbasynyń «Álem. HHІ ǵasyr» manıfesine qyzý qoldaý kórsetti», dedi Senat tóraǵasy.
