Senat osy sessııa barysynda 96 zań qabyldady - Q. Mámı
ASTANA. 27 maýsym. QazAqparat - Parlament Senaty osy sessııa barysynda 96 zań qabyldady.
Búgin Parlament Senatynyń jalpy otyrysynan soń sessııany qorytyndylap, jýrnalıstermen brıfıng ótkizgen Senat Tóraǵasy Qaırat Mámı osylaı málim etti.
«Jalpy osy sessııa barysynda Senat 96 zań qabyldady. Zań shyǵarýshylyq qyzmetimizdegi basty erekshelik - zań jobalarynyń basym bóligi Elbasynyń byltyrǵy «Qazaqstan -2050» strategııasy qamtylǵan Joldaýynda júktelgen mindettermen úılesedi. Qabyldanǵan zańdar ındýstrııalyq-ınnovatsııalyq saıasatty júzege asyrýǵa, memlekettik qyzmetti, sot jáne quqyq qorǵaý júıelerin reformalaýǵa, bilim berýdi damytýǵa baǵyttalyp, halyqty áleýmettik qamsyzdandyrýdy qamtydy», - dedi spıker.
Onyń aıtýynsha, sessııa barysynda Eýrazııalyq ekonomıkalyq ıntegratsııany ilgeriletetin birqatar halyqaralyq kelisimsharttarǵa da basa nazar aýdaryldy.
