Senat órt qaýipsizdigine qatysty zań jobasyna ózgerister men tolyqtyrýlar engizip, Májiliske qaıtardy
áýirdiń 21-i. QazAqparat /Aıdar Ospanalıev/ - Búgin Parlament Senatynyń jalpy otyrysynda senatorlar «Qazaqstan Respýblıkasynyń keıbir zańnamalyq aktilerine órt qaýipsizdigi máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda qarap,
Májiliske qaıtardy, dep habarlaıdy QazAqparat.
Parlament Senatynyń Agrarlyq máseleler jáne qorshaǵan ortany qorǵaý komıtetiniń múshesi Sergeı Plotnıkovtyń aıtýynsha, atalmysh zań jobasy memleket pen bıznestiń arasyndaǵy qarym-qatynastardy jetildirý baǵytyndaǵy jumystar aıasynda júzege asyryldy. Osyǵan qaraı ol Memleket basshysynyń osy sala boıynsha alǵa qoıyp otyrǵan mindetterine tolyq jaýap beredi. «Qujat órt qaýipsizdigi salasyndaǵy táýekelderdi táýelsiz baǵalaý júıesin engizip, órt qaýipsizdigi salasyndaǵy memlekettik baqylaýdyń ashyqtyǵyn qamtamasyz etýdi kózdeıdi. Sonymen qatar ol shaǵyn jáne orta bızneske jasalýy yqtımal ákimshilik kedergilerdiń aldyn alýdy qarastyrady», dedi depýtat.
Onyń sózine qaraǵanda, zań jobasyn qaraý barysynda komıtet ókilderiniń eskertpeleri men usynystary negizinde Májilis maquldaǵan qujatqa birqatar ózgerister men tolyqtyrýlar engizý qajet boldy. «Mysaly zań jobasyndaǵy adamdar jappaı jınalatyn nysan uǵymy naqtylanyp, tolyqtyryldy. Sonymen qatar jergilikti atqarýshy organdardyń órt qaýipsizdigi salasyndaǵy ókilettikteri de aıtarlyqtaı jetildirildi. Buǵan qosa taǵy órtke qarsy erikti qurylymdardyń tizimin júrgizý qyzmetin ýákiletti organnyń aýmaqtyq bólimshesine berý qajet deshen sheshim qayldandy. Zań jobasyna budan ózge de birqatar ózgerister men tolyqtyrýlar engizildi», dedi senator.
Osyǵan baılanysty depýtattar atalmysh qujatty jan-jaqty talqylaı kele ony ózderi engizgen ózgerister men tolyqtyrýlar negizinde Májiliske qaıtarý qajet dep sheshti.
