Senat órt qaýipsizdigine arnalǵan joba boıynsha kelisim komıssııasynyń usynystaryn qabyldady
ASTANA. Maýsymnyń 10-y. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine órt qaýipsizdigi máseleleri boıynsha ózgerister men tolyqtyrýlar engizý týraly» zań jobasy boıynsha qos palata arasyndaǵy kelispeýshilikti eńserý jónindegi kelisim komıssııasynyń usynystaryn talqylady.
Zań jobasy halyqtyń, zańdy tulǵalar men dara kásipkerler múlkiniń qorǵalý deńgeıin olardyń qaýipsizdigi jaı-kúıin baǵalaýdy táýelsiz sarapshy uıymdar salasyna engizý jolymen arttyrý maqsatynda ázirlengen. Sonymen birge, qujat boıynsha memlekettik órt baqylaý organdary júzege asyratyn tekserister sanyn qysqartý esebinen qorǵaý nysandaryna ákimshilik júktemeni azaıtý jáne baqylaý qyzmetiniń nysandary men ádisterin jetildirý sharalary da qamtylady. Zańnamalyq deńgeıde sarapshy uıymdardy akkredıtteý tártibi, sarapshy uıymdardyń da, ýákiletti organnyń da qaterdi baǵalaý salasyndaǵy quqyqtary men mindetteri aıqyndalady.
Sonymen birge, memlekettik órt baqylaý organdary jeke kásipkerlik sýbektileriniń bir bóligin tekserýden bosatady, olardyń negizgi kúshi qaýiptiligi joǵary jáne áleýmettik nysandardy baqylaýǵa qaraı baǵyttalady. Qujatta qarastyrylǵan normalar arqyly kásipkerlik qyzmetti tekserý úderisteri birshama qysqarady. Budan bólek, órtke qarsy erikti qurylymdardy qurý jáne olardyń qyzmetin júzege asyrýdyń tártibi reglamentteletin bolady.
Kelisim komıssııasynyń usynysy boıynsha qaraýǵa shyǵarylǵan bir ustanym Parlament Senatynyń redaktsııasynda, qalǵany birlesken redaktsııada qabyldandy.
