Senat órt qaýipsizdigi máseleleri boıynsha ózgerister engizilgen zań jobasyn birinshi oqylymda maquldady
ASTANA. Sáýirdiń 9-y. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine órt qaýipsizdigi máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady.
Zań jobasy ekinshi oqylymǵa ázirleýge tapsyrylady, dep habarlaıdy QazAqparat.
Zań jobasy halyqtyń, zańdy tulǵalar men dara kásipkerler múlkiniń qorǵalý deńgeıin olardyń qaýipsizdigi jaı-kúıin baǵalaýdy táýelsiz sarapshy uıymdar salasyna engizý jolymen arttyrý maqsatynda ázirlengen. Sonymen birge, qujat boıynsha memlekettik órt baqylaý organdary júzege asyratyn tekserister sanyn qysqartý esebinen qorǵaý nysandaryna ákimshilik júktemeni azaıtý jáne baqylaý qyzmetiniń nysandary men ádisterin jetildirý sharalary da qamtylady. Zańnamalyq deńgeıde sarapshy uıymdardy akkredıtteý tártibi, sarapshy uıymdardyń da, ýákiletti organnyń da qaterdi baǵalaý salasyndaǵy quqyqtary men mindetteri aıqyndalady.
«Órt qaýipsizdigi salasynda táýelsiz sarapshy uıymdar júıesin engizý memlekettik baqylaý júrgizýdegi ashyqtyqty qamtamasyz etedi, bul sybaılas jemqorlyqtyń aldyn alýǵa baǵyttalǵan shara retinde qarastyrylyp otyr. Sonymen birge, memlekettik órt baqylaý organdary jeke kásipkerlik sýbektileriniń bir bóligin tekserýden bosatylady, olardyń negizgi kúshi qaýiptiligi joǵary jáne áleýmettik nysandardy baqylaýǵa qaraı baǵyttalady. Sonymen birge, qujatta qarastyrylǵan normalar arqyly kásipkerlik qyzmetti tekserý úderisteri birshama qysqarady», dedi zań jobasy boıynsha baıandama jasaǵan Tótenshe jaǵdaılar mınıstri Vladımır Bojko.
Onyń aıtýyna qaraǵanda, qujat boıynsha órtke qarsy erikti qurylymdardy qurý jáne olardyń qyzmetin júzege asyrýdyń tártibi reglamentteletin bolady.
