Senat organıkalyq ónimderdi arnaıy tańbalaýdy talap etetin zańdy maquldady

ASTANA. KAZINFORM — Senat depýtattary «Organıkalyq ónim óndirisi jáne aınalymy týraly» zańdy maquldady.

Zańǵa palatanyń agrarlyq máseleler, tabıǵat paıdalaný jáne aýyldyq aýmaqtardy
damytý komıteti qorytyndy jasaǵan.

Komıtet múshesi Arman Óteǵulovtyń aıtýynsha, zańda organıkalyq ónim óndirisine kóshýdiń negizgi sharttary kózdelgen.

Sondaı-aq zańda organıkalyq ónimdi óndirýge jáne tańbalaýǵa, organıkalyq ónim aınalymyna tikeleı talaptar belgilenip, esepke alý jáne qadaǵalaý júıesi engizilgen.

«Zańmen organıkalyq ónim óndirý protsesin sertıfıkattaý kózdeledi. Bul tásil óndiristik protsesterdi naqtylaıdy jáne halyqaralyq tájirıbege sáıkes keledi. Sondaı-aq, sáıkestik sertıfıkatynyń qoldanylýyn toqtata turýdyń jáne toqtatýdyń negizi aıqyndaldy. Organıkalyq ónim óndirýshiler birlesken qyzmet týraly shart negizinde (jaı seriktestik) toppen sertıfıkattaýdan óte alady», — deıdi Armen Óteǵulov. 

Onyń aıtýynsha, bul organıkalyq óndirýshilerdiń yntymaǵy men ıntegratsııasyna yqpal etedi jáne belgili bir óndirýshi úshin sertıfıkattaýǵa ketetin shyǵyndardy azaıtady.

Organıkalyq ónimdi qoldan jasaýmen kúresý úshin organıkalyq ónimdi tańbalaý qarastyrylǵan.

«Mundaı tańbalaý sáıkestik sertıfıkaty bolǵan jaǵdaıda ǵana júzege asyrylady. Al onyń jarnamasynda tek „organıkalyq“ degen sóz ben onyń týyndylary qoldanylýy múmkin. Zań organıkalyq ónim óndirisi men aınalymy salasyndaǵy ǵylymı qamtamasyz etýdi reglamentteıtin bappen tolyqtyryldy. Jalpy zań eldegi azyq-túlik qaýipsizdigin qamtamasyz etýge, sapaly jáne ekologııalyq taza ónimdi tutynýǵa oń áser etedi», — dedi senator.