Senat óńirlerdiń múddesin qorǵaıtyn Palataǵa aınalady - Máýlen Áshimbaev
Kezdesý barysynda Máýlen Áshimbaev aldaǵy ýaqytta Senat óńirlerdiń múddesin bildiretin Palata retinde máslıhattarmen baılanysty odan ári arttyrýdy josparlap otyrǵanyn aıtty. Palata Spıkeri óz sózinde osy baǵyttaǵy jumystyń naqty baǵyttary men formatyna keńinen toqtaldy.
«Zań shyǵarý isi aýqymdy ári keshendi protsess. Zańdardyń barlyq normalary aldyn ala jan-jaqty talqylanyp, pysyqtalady. Osy jumystarǵa máslıhat depýtattarynyń turaqty qatysýy aıryqsha mánge ıe. Sizder jergilikti jerlerdegi jaǵdaıdy jaqsy bilesizder. Sondyqtan zań shyǵarý isinde máslıhat depýtattarynyń oı-pikirleri men usynystarynyń mańyzy zor», – dedi Máýlen Áshimbaev.
Senat tóraǵasy Memleket basshysy Qasym-Jomart Toqaevtyń bastamasymen iske asyrylǵan konstıtýtsııalyq reformanyń nátıjesinde máslıhattardyń róli artqanyn jáne saılaý úlgisi ózgergenin de tilge tıek etti. Mundaı sharalardyń bári jergilikti jerde básekeli saıası orta qalyptastyryp, eldiń aldynda bedeli bar jańa tulǵalardyń saıasatqa kelýi úshin qolǵa alynyp otyr.
Sonymen qatar Máýlen Áshimbaev elimizde júrgizilip jatqan júıeli saıası jańǵyrtýlar aıasynda Senattyń aldynda turǵan maqsat-mindetterge toqtaldy.
«Budan bylaı Senat óńirlerdiń múddesin qorǵaıtyn Palataǵa aınalady. Mańyzdy ekonomıkalyq jáne áleýmettik protsester negizinen aımaqtarda ótetini belgili. Óńirlerdi keshendi túrde damytpaı, tutas el damýyn jańa deńgeıge kóterý múmkin emes. Sondyqtan Memleket basshysy bergen tapsyrmalardyń, ulttyq jobalardyń, shaǵyn jáne orta bıznesti qoldaýǵa arnalǵan baǵdarlamalardyń óńirlerde iske asyrylý barysyn baqylaýǵa basa mán beriledi», – dedi Máýlen Áshimbaev.
Sondaı-aq Senat Spıkeri agrarlyq salada eńbek etip júrgen jergilikti mamandarmen jáne eńbek ujymdarymen kezdesti. Іs-sharada «Jambyl oblysy turǵyndarynyń tabysyn arttyrý» jáne «Aýyldardyń densaýlyq saqtaý júıesin jańǵyrtý» pılottyq jobalaryn iske asyrý barysy talqylandy.
«Prezıdentimiz aýyl sharýashylyǵyn jáne aýyldyq aýmaqtardy damytýǵa únemi basa mán berip keledi. Aýyl sharýashylyǵy kooperatsııasyn damytýǵa úlken kóńil bólinedi. Aldaǵy jyldarda memleket tarapynan osy maqsatqa 1 trıllıon teńge bólinedi. Ol 1 mıllıon aýyl turǵynyn qamtıdy. Biz bıýdjetti qaraý jáne zańnamalyq jumys barysynda osy máselelerdi nazarǵa alyp, jumys isteımiz. Sizder aıtqan usynystar men bastamalardyń bári qoldaýǵa laıyq. Olardy iske asyrý jolynda bárimiz birge belsendi jumys isteýimiz kerek», – dedi Máýlen Áshimbaev.
Oblysqa sapary kezinde Senat Tóraǵasy Qarataý qalasynyń ortalyq qazandyǵynyń jaı-kúıimen jáne shahardaǵy úıler men ınfraqurylymdy qalpyna keltirý jumystarymen tanysty. Aıta keteıik, bir apta buryn bul óńirde qatty daýyl soǵyp, saldarynan aımaqtaǵy ınfraqurylymǵa, kóp qabatty jáne jeke turǵyn úılerge, áleýmettik nysandarǵa, sondaı-aq, elektr baǵandary men jelisine aıtarlyqtaı zardaby tıgen edi.
Foto: senate.parlam.kz