Senat «Ońaltý men bankrottyq týraly» zań jobasyn Májiliske qaıtardy
ASTANA. QazAqparat - Búgin Parlament Senatynyń jalpy otyrysynda palata depýtattary «Ońaltý jáne bankrottyq týraly» zań jobasyn Májiliske qaıtardy. Zań jobasy ońaltý jáne bankrottyq rásimderin jeńildetýge baǵyttalǵan jáne boryshkerdi bankrot dep taný negizderin belgileıdi.
«Bankrottyq júıesin reformalaýǵa baılanysty ózgeristerdiń bir toptamasy tólemge qabiletsizdikti sheshý qaǵıdattaryn ózgertýge negizdeledi. Bizdiń qoldanystaǵy tártip birshama deńgeıde kásiporyndardy taratýǵa baǵyttalǵan jáne qarjylyq saýyqtyrý rásimderin qoldanýdy yntalandyrmaıdy. Al bankrottyq júıeni reformalaý «kóleńkeli ekonomıkaǵa» qarsy is-qımyl jasaý sharalarynyń biri bolyp tabylady. Óıtkeni, búgingi tańda kóptegen josyqsyz boryshkerler bankrottyq rásimin jaýapkershilikten jáne kredıtorlar aldyndaǵy óz mindetterin oryndaýdan jaltarý ádisi retinde paıdalanyp otyr», - deıdi Premer-Mınıstr orynbasary-Qarjy mınıstri Baqyt Sultanov. Onyń aıtýynsha, zań jobasynda bankrottyq júıege kózqarastardy ózgertý kózdeledi. Munda eń aldymen syrttaı baqylaýshydan ýaqytsha basqarýshy tulǵany engizýge kóshý qarastyrylady. «Búgingi syrttaı baqylaý rásimi tıimsiz ári boryshkerdiń tólemge qabilettiligin naqty sheshe almaıdy. Sondyqtan da zań jobasymen osy rásim alynyp tastalady», - deıdi B. Sultanov. Sonymen qatar, boryshkerdiń jaýapkershiligi kúsheıtiledi. Bul onyń laýazymdy adamdarymen sýbsıdıarlyq jaýapkershilikti belgileý arqyly kúsheıtiledi. Mınıstrdiń aıtýynsha, osy normalar qasaqana bankrottyq jaǵdaılardy birshama qysqartady dep kútiledi. Talqylaý barysynda Senat Májilis maquldaǵan qujatqa birshama ózgerister engizdi. Atap aıtqanda, «jalǵan bankrottyq» uǵymy jańa redaktsııada jazylyp otyr. Budan basqa da birqatar normalar naqtylanady.
