Senat Oman Sultandyǵymen salyq zańnamasyn sáıkestendiretin zańdy maquldady
ASTANA. KAZINFORM — Senat Qazaqstan Úkimeti men Oman Úkimeti arasyndaǵy tabys pen kapıtalǵa salynatyn salyqtarǵa qatysty qosarlanǵan salyq salýdy boldyrmaý jáne salyqtan jaltarýǵa jol bermeý týraly kelisimdi ratıfıkatsııalaıtyn zańdy maquldady.
Qujatty senator Sultanbek Mákejanov tanystyrdy.
— Kelisimge 2025 jylǵy 29 mamyrda Astana qalasynda qol qoıyldy jáne 2025 jylǵy 4 qyrkúıekte Oman Sultandyǵynda kelisim ratıfıkatsııalandy. Kelisimniń basty maqsaty — kásipkerler men ınvestorlardyń bir tabysqa eki memlekette qatar salyq tóleýine jol bermeý. Búginde mundaı kelisimderge Qytaı, Ulybrıtanııa, Kanada, AQSh, Germanııa sııaqty 55 memleketpen qol qoıylǵan, — dedi ol.
Depýtat sońǵy jyldary eki el arasyndaǵy saýda aınalymy da, ınvestıtsııalyq baılanystar da turaqty túrde damyp kele jatqanyn atap ótti.
— Oman memleketimen arada sońǵy on jyldyń ishinde bizde 27 mıllıon dollarǵa jýyq taýar aınalymy boldy. Onyń ishinde taýar aınalymdaǵy ımport 18 mıllıon dollar bolǵan, al eksport 9 mıllıon dollarǵa jýyq. Qazir bizdiń memlekette Oman kapıtalymen jeti mekeme tirkelgen, onyń altaýy turaqty jumys isteıdi, — dedi senator.
Sondaı-aq, ol kelisim talaptary Qazaqstan aýmaǵynda korporatıvtik tabys salyǵyna, jeke tabys salyǵyna, zańdy jáne jeke tulǵalardyń múlkine salynatyn salyqqa qoldanylatynyn aıtty.
— Omanda múliktik jáne jeke tabys salyǵy bolmaǵandyqtan, tabys salyǵyna baılanysty qoldanylady. Kelisimniń 21-babyna sáıkes, oqytýshylar men ǵalymdardyń syıaqysy qabyldaýshy elde úsh jylǵa deıin salyqtan bosatylady, — dedi Sultanbek Mákejanov.
Kelisim mynandaı máselelerdi retteıdi:
— salyq salý maqsatynda rezıdenttikti anyqtaý;
— turaqty mekeme qurý;
— salyq salýǵa jatatyn tabysty bólý (dıvıdendter, paıyzdar, roıaltı, kásipkerlik qyzmetten túsetin tabys jáne t. b.);
— salyqtyq aqparat almasý tártibi;
— jeńildikterdi shekteý týraly baptar.
Kelisim ınvestıtsııalyq ahýaldy jaqsartýǵa, sheteldik kapıtal men tehnologııa tartýǵa, kásipkerler úshin túsinikti ári turaqty salyqtyq orta qalyptastyrýǵa baǵyttalǵan.
Eske salsaq, Qazaqstan men Oman energetıka men tsıfrlandyrý salalarynda yntymaqtastyqty keńeıtýge ýaǵdalasyp otyr.
