Senat oqýshylarǵa sabaq kezinde telefon paıdalanýǵa tyıym salatyn zańdy maquldady
ASTANA. KAZINFORM – Búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine bilim berý, tálimgerlik jáne balalardyń qaýipsizdigi máseleleri boıynsha ózgerister men tolyqtyrýlar engizý týraly» Zańy maquldandy.
Zań Parlament depýtattarynyń bastamasymen ázirlendi. Qujatty qabyldaýdaǵy negizgi maqsat – bilim berý salasyndaǵy jáne jetim balalar men ata-anasynyń qamqorlyǵynsyz qalǵan balalardyń quqyqtaryn qorǵaý salasyndaǵy ulttyq zańnamany odan ári jetildirý.
«Zań jetim balalar úshin tálimgerlik ınstıtýtyn engizýdi, balalardyń qaýipsizdigin qamtamasyz etýdi jáne bilim berý uıymdarynyń basqarý erkindigin keńeıtýdi kózdeıdi. Birinshiden, jergilikti ákimdikter bilim berý sapasyn qamtamasyz etý boıynsha tıisti aýmaqtyń bilim berýdi damytý josparynyń jobasyn ázirleý jáne ony máslıhattyń bekitýine usynýy eskerilgen. Sondaı-aq, jergilikti ákimdikter tıisti aýmaqta bilim berý uıymdaryn materıaldyq-tehnıkalyq qamtamasyz etý jóninde sharalar qabyldaýyn mindetteıtin jáne apattyq jaǵdaıǵa jol bermeýi men seısmıkalyq ornyqtylyǵyn arttyrý maqsatynda olardyń jaı-kúıin baqylaýdy bes jyl saıyn júzege asyrý týraly normalary usynylǵan», - dedi senator Altynbek Nýhuly.
Budan bólek, balalardyń qaýipsizdigi úshin terezelerdi qaýipsizdik qulyptarymen qamtamasyz etý mindeti týraly norma usynylǵan. Sonymen qatar, jańa yqsham aýdandarynda kóppáterli turǵyn úı salý kezinde, qurylys jobalaý qujattarynda áleýmettik mańyzy bar - bilim berý jáne densaýlyq saqtaý obektileriniń mindetti túrde bolýyn eskerý týraly normalar engizilgen. ıAǵnı, densaýlyq saqtaý jáne bilim berý obektilerin ornalastyrý esepke alynbasa, onda bul aýmaqta kóppáterli turǵyn úılerdi salýǵa tyıym salynady. Jańa talap úsh aýysymdy mektepter máselesin sheshýge, sapaly bilim berýge jáne turǵyndarǵa medıtsınalyq kómekti ońaı ári jyldam alýǵa múmkindik beredi.
«Munymen qosa, arnaıy bilim berý uıymdaryndaǵy jetim balalardyń, ata-anasynyń qamqorlyǵynsyz qalǵan balalardyń óz betinshe ómir súrýge daıyndalýyna jeke qoldaý men kómektesýge baǵyttalǵan tálimgerlik qyzmetin engizý qaralyp otyr. Atalǵan normany qabyldaý - balalardy tolyqqandy áleýmettendirýge, psıhologııalyq qoldaýǵa jáne áleýmettik qorǵaýǵa yqpal etedi», - dedi depýtat.
Onyń sózine qaraǵanda, oqý protsesinde uıaly telefondardy paıdalanýǵa shekteý qoıýdy engizý, testileýsiz birinshi synypqa qabyldaý, balabaqshalarǵa oryn berý boıynsha biryńǵaı kezektilikti qamtamasyz etý, bilim berý uıymdarynda zorlyq-zombylyqty nasıhattaıtyn, dinı sıpattaǵy aqparattyń taralýyna jol bermeý jáne sýıtsıdke shaqyrýdy boldyrmaý sharalaryn qabyldaýdy kózdeıtin normalar usynylǵan.
«Qoryta aıtqanda, Zań – bilim berý salasyndaǵy qoldanystaǵy zańnamadaǵy quqyqtyq olqylyqtardy joıý maqsatyn kózdeıdi jáne elimizdegi bilim berýdiń sapasyn arttyrý men retteýdiń ulttyq júıesiniń tıimdiligin odan ári kúsheıtýge baǵyttalǵan», - dedi senator.
