Senat oblystyq máslıhat hatshylarynyń qatysýymen semınar ótkizýdi josparlaıdy
ASTANA. 8 aqpan. QazAqparat - Búgin Parlament Senatynda palatanyń vıtse-spıkeri Aleksandr Sýdınniń tóraǵalyǵymen Jergilikti ókildi organdarmen (máslıhattarmen) ózara is-qımyl jasaý jónindegi keńestiń otyrysy bolyp ótti.
Jıyn barysynda atalǵan Keńestiń basshylyq quramy bekitildi. Atap aıtqanda, quramyna 20 senator enetin Jergilikti ókildi organdarmen (máslıhattarmen) ózara is-qımyl jasaý jónindegi keńestiń tóraǵasy bolyp Senat Tóraǵasy Qaırat Mámı bekitildi. Budan bólek, basshylyq quramda keńes tóraǵasynyń orynbasaryna vıtse-spıker Aleksandr Sýdın taǵaıyndalsa, hatshysy bolyp Ekonomıkalyq damý jáne kásipkerlik komıtetiniń tóraǵasy Talǵatbek Abaıdildın bekitildi.
Budan bólek, keńes barysynda aldaǵy jumys josparlary bekitildi. Oǵan sáıkes, aǵymdaǵy jyldyń birinshi toqsanynda senatorlar oblys máslıhattarynyń hatshylaryn qatystyryp, semınar-keńes ótkizýdi josparlaıdy. «Bul semınar oblys máslıhattarynyń jumysyn úılestirý úshin asa qajet. Sondaı-aq, bundaı shara Memleket basshysynyń jergilikti ózin ózi basqarýdy damytý jónindegi júktegen tapsyrmasyn laıyqty deńgeıde sheshýge septigin tıgizedi», - dedi A. Sýdın.
