Senat oblystardy damytý strategııalary boıynsha parlamenttik tyńdaýlar ótkizbek
NUR-SULTAN. QazAqparat - QR Parlamenti Senaty 2020 jyldan bastap oblystardy damytý strategııalary boıynsha parlamenttik tyńdaýlar ótkizýdi josparlap otyr.
Bul týraly búgin Qazaqstan máslıhattarynyń 25 jyldyǵyna arnalǵan respýblıkalyq konferentsııada QR Parlamenti Senatynyń tóraǵasy Darıǵa Nazarbaeva aıtty, dep habarlaıdy QazAqparat tilshisi.
«Senat óziniń konstıtýtsııalyq sıpatyna sáıkes elimizdiń óńirlerimen, oblystyq máslıhattarmen tikeleı, tyǵyz baılanysta. Prezıdent Qasym-Jomart Toqaev «Qýatty aımaqtar - qýatty Qazaqstan» - degendi aıtty. Bul bizdiń ortaq mindetimiz - turaqty qarym-qatynasty nyǵaıtý ekenin bildiredi. Senattyń janynan Jergilikti ókildi organdarmen ózara árekettesý úshin qurylǵan Keńes osy baǵytta jumys isteýi kerek», - dedi Senat tóraǵasy.
Sonymen qatar, Darıǵa Nursultanqyzy kelesi jyldan bastap oblystardy damytý strategııalary boıynsha, Senatta máslıhat depýtattary men Úkimet ókilderiniń qatysýymen parlamenttik tyńdaýlar ótkizý tájirıbesin engizgeli jatqandyǵyn aıtty.
«Sondaı-aq, men barlyq áriptesterime Parlament Senatynda biryńǵaı veb-portal iske qosylǵany týraly habarlaǵym keledi. Onda Joǵarǵy Palatanyń depýtattary men barlyq deńgeıdegi ókildi organdar tirkelgen. Biz bul portaldy onlaın rejımdegi qyzmettik baılanys quraly, depýtattar arasyndaǵy turaqty tildesý alańy dep bilemiz. Sizderden syndarly suhbat pen nátıjeli aqparat, belsendi qatysýdy kútemiz», - dedi Senat tóraǵasy.
Darıǵa Nazarbaeva sóz sóılep bolǵannan keıin birqatar óńirdiń máslıhat depýtattaryna QR Parlamenti Senatynyń Alǵys hattaryn tabys etti.
