Senat normashyǵarmashylyqty jetildiretin zańdy qabyldady
NUR-SULTAN. QazAqparat – Búgin QR Parlamenti Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine normashyǵarmashylyqty jetildirý máselesi boıynsha ózgerister men tolyqtyrýlar engizý týraly» Zań qabyldandy, dep habarlaıdy QazAqparat tilshisi.
Qujat boıynsha negizgi baıandama jasaǵan Ádilet mınıstri Marat Beketaevtyń aıtýynsha, zań jobasy zańdardy ázirleý, olar boıynsha qoǵamdyq talqylaýlar ótkizý jáne zańdardy qabyldaý rásimderin jetildirý maqsatynda ázirlendi.
«Zań jobasynda mynadaı negizgi erejeler kózdeledi. Birinshi - «Halyq únine qulaq asatyn memleket» tujyrymdamasyna sáıkes keletin zań shyǵarý qyzmetiniń jańa kezeńderin engizý. Atap aıtqanda, ázirleýshi organdar retteýshilik saıasattyń konsýltatıvtik qujatyn ázirleıdi. Bul qujatta problemalar men yqtımal sheshimder kórsetiledi. Ol múddeleri qozǵalatyn maqsatty toptarmen talqylanatyn bolady. Talqylaý qorytyndysy boıynsha zań jobasynyń tujyrymdamasy jasalady. Bul naqty usynystary kórsetilgen retteýshi organnyń resmı málimdemesi», - dedi ol.
Mınıstrdiń atap ótýinshe, ekinshiden zań jobalaryn qoǵamdyq talqylaý tásilderin keńeıtý kózdeledi.
Azamattardy jańa retteýge aldyn ala daıyndaý maqsatynda árbir zań jobasy men qabyldanǵan zań aqparattyq túsindirý baǵdarlamasymen súıemeldenetin bolady.
«Úshinshi- zań jobalarynyń ǵylymı quqyqtyq saraptamasynyń sapasyn arttyrý. Bir uıymnyń ǵylymı resýrstarymen shektelmeı, osy jumysqa tıisti bilimi bar eldegi barlyq ǵylymı sarapshylardy tartý, bul jumysty úılestirýdi Zańnama jáne quqyqtyq aqparat ınstıtýtyna júkteý usynylady. Tórtinshi - azamattar men bızneske qosymsha mindetter júkteıtin normalarǵa qatysty «ótpeli kezeń» tájirıbesin zańnamalyq deńgeıde belgileý. Jańa mindetterdi belgileıtin normalar halyq pen bıznestiń daıyn bolýyna qaraı, qabyldanǵan kúninen bastap 60 kúndik merzimnen erte engizilmeıtin bolady», - dedi ol.
Onyń atap ótýinshe, besinshiden qabyldanǵan zańdardyń tıimdiligin baǵalaý júrgiziledi.
«Zańdar qabyldanǵannan keıin, olardyń tıimdiligin baǵalaý mindeti usynylyp otyr. Bul mindet zańdy ázirlegen memlekettik organdarǵa júkteletin bolady. Qabyldanǵan zańnyń tıimdiligin baǵalaý úshin, ázirleýshi organ jańa retteýdiń salystyrmaly nátıjeleri kórsetilgen esepti daıyndaıdy. Bul esep quqyqtyq monıtorıng aıasynda qoldanylatyn bolady, sondaı-aq, Parlamenttik tyńdaýda nemese Úkimet saǵatynda talqylanýy múmkin»,- dedi Marat Beketaev.
