Senat «Neke jáne otbasy týraly» jobany Májiliske jiberdi
TANA. 6 qazan. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda palata depýtattary «Neke (erli-zaıyptylyq) jáne otbasy týraly» Qazaqstan Respýblıkasy Kodeksiniń jobasyn ekinshi oqylymda talqylady.
Qujatqa senatorlar tarapynan birqatar ózgerister engizilgendikten joba Májiliske qaıtaryldy.
Esterińizge sala keteıik, joba elimizdegi neke-otbasy qatynastaryn retteýge olardyń júzege asyrylýynyń kepildikterin belgileýge, sondaı-aq otbasynyń quqyqtary men múddelerin qorǵaýdy qamtamasyz etýge baǵyttalyp otyr. Bul rette Kodeks jobasy adamnyń jeke ómirine qol suqpaý, jeke ómiriniń qupııasyn jarııa etpeý týraly laýazymdy tulǵanyń jaýapkershiligin kózdeıdi. Sonymen qatar, jobada nekeni qııýdyń, ony jaramsyz dep tanýdyń sharttary men tártibi aıqyndalady. Erli-zaıyptylardyń, balanyń, ata-analardyń, bala asyrap alýshylardyń quqyqtary men mindetteri naqtylanady. Balany asyrap alýdyń tártibi, qorǵanshylyq pen qamqorshylyqty retteý máseleleri qamtylady. Otbasy músheleriniń, erli-zaıyptylardyń, burynǵy erli-zaıyptylardyń jáne otbasynyń basqa da músheleriniń alımenttik mindettemeleri bekitiledi. Qujattaǵy jańa erejelerge keletin bolsaq, onda sýrrogat ana bolý jáne urpaqty bolýdyń qosalqy ádisteri men tehnologııalaryn qoldaný máselelerin retteıtin normalar qamtylǵan. Budan bólek, bala asyrap alý jónindegi agenttikterdi akkredıtteý normalary da kodıfıkatsııalanady.
Qujatty talqylaý barysynda senatorlar tarapynan birshama usynystar jasalǵan bolatyn. Solardyń basym bóligi qabyldandy. Atap aıtqanda, Senat engizgen túzetý boıynsha Qazaqstannan tys jerde turaqty turatyn Qazaqstan azamattarynyń jáne sheteldikterdiń bala asyrap alýynyń tártibi Balalardy qorǵaý jáne balany sheteldik asyrap alýǵa qatysty konventsııaǵa sáıkes keltirildi. Sheteldik bala asyrap alýshylardyń asyrap alynǵan balalardyń tirshilik jaǵdaıy, oqýy jáne densaýlyǵynyń jaı-kúıi týraly esepter usynýynyń tártibi reglamentteldi. Budan bólek, Senat alıment tóleý týraly kelisim bolmaǵan jaǵdaıda jalpy orta, tehnıkalyq jáne kásiptik orta bilimnen keıigi bilim berý júıesinde, kúndizgi oqý nysany boıynsha joǵary bilim berý júıesinde oqıtyn balalardy kútip-baǵýǵa qarajatty sot tártibimen óndirip alý jóninde normany engizip otyr.
