Senat nasybaı satqandarǵa qylmystyq jaza taǵaıyndaıtyn zańdy qarastyryp jatyr
ASTANA. KAZINFORM – Qazaqstanda nasybaı satýshylar Qylmystyq kodeks aıasynda jaýapqa tartylady. QR ІІM Ákimshilik polıtsııa komıtetiniń aldyn alý qyzmeti basqarmasynyń bastyǵy Rýslan Qarjaspekovtyń aıtýynsha, zań jobasy Senatta qaralyp jatyr.
Spıkerdiń aıtýynsha, qazir nasybaı satý boıynsha QR Ákimshilik quqyqbuzýshylyqtar týraly kodekste jaýapkershilik qarastyrylǵan (196-bap – «Taýarlarmen nemese ózge de zattarmen zańsyz saýda jasaý») jáne 25 AEK kóleminde aıyppul kózdelgen. Bul shamamen 92 300 teńge.
«Qazir Senatta Densaýlyq saqtaý mınıstrligi bastamashylyq etken zań jobasy jatyr, onyń sheńberinde nasybaı men veıpterdi taratqany úshin qylmystyq jaýapkershilik kózdeledi jáne ol ákimshilik emes, qylmystyq jaýapkershilik retinde esepteletin bolady», - dedi Rýslan Qarjaspekov agenttik tilshisine bergen suhbatynda.
Eske sala ketsek, Atyraýda ótken Ulttyq quryltaı otyrysynda QR Prezıdenti Qasym-Jomart Toqaev nasybaıdy óndirýge jáne taratýǵa 2015 jyly tyıym salynsa da, áli kúnge deıin kóshede, tipti azyq-túlik dúkenderinde ashyq satylyp jatqanyn synaǵan edi.
Rýslan Qarjaspekov munyń sebebin shaǵyn jáne orta bıznesti tekserýge jarııalanǵan moratorıımen túsindirdi. Sondyqtan quqyq qorǵaý organdary satý núktelerin ózdiginen teksere almaǵan. Degenmen polıtsııa nasybaıdyń zańsyz satylýy týraly azamattardyń ózderi habarlaǵan jaǵdaılardy qoldanǵan.
Onyń aıtýynsha, 2023 jyly Qazaqstanda nasybaı satýdyń 190-ǵa jýyq faktisi jáne qoǵamdyq oryndarda zańsyz paıdalanýdyń 18 myń jaǵdaıy tirkelgen.
