Senat nashar kóretin adamdarǵa jaǵdaı jasaýǵa arnalǵan zańdy maquldady
ASTANA. KAZINFORM — Búgin Senattyń jalpy otyrysynda «Zaǵıptardyń jáne kórý qabileti buzylǵan nemese baspa aqparatyn qabyldaý qabileti ózgedeı shektelgen adamdardyń jarııa etilgen týyndylarǵa qol jetkizýin jeńildetý týraly Marrakesh shartyn ratıfıkatsııalaý týraly» Zańy maquldandy.
- 2013 jylǵy 27 maýsymda Dúnıejúzilik zııatkerlik menshik uıymynyń dıplomatııalyq konferentsııasynda qabyldaǵan Marrakesh sharty kórý qabileti buzylǵan adamdar úshin ádebı jáne kórkem shyǵarmalarǵa qol jetkizýdi jeńildetýge, sondaı-aq kedergilerdi joıýǵa jáne olardyń fızıkalyq qabiletterine qaramastan, barlyq azamattar úshin bilim men jarııalanǵan shyǵarmalarǵa teń qol jetkizýdi qamtamasyz etýge baǵyttalǵan. Bul shart zaǵıptar men nashar kóretin adamdar úshin yńǵaıly formattaǵy týyndylardy kóbeıtýge, taratýǵa, jalpyǵa ortaq nazarǵa jetkizýge jáne jarııalaýǵa múmkindik berý maqsatynda avtorlyq quqyqtarǵa qatysty shekteýler men erekshelikterdiń standartty jıyntyǵyn qamtyp otyr. Qujat avtorlyq quqyqtarǵa qatysty ulttyq zańnamany Marrakesh shartyna sáıkes keltirýdi qarastyrady, - dedi senator Amangeldi Tolamısov.
Sonymen qatar, Marrakesh sharty ýákiletti organdar jelisi boıynsha tıisti formattaǵy týyndylarmen transshekaralyq almasýdy júzege asyrýǵa, sondaı-aq zaǵıptar men nashar kóretin adamdarǵa arnalǵan kitaphanalar jelisiniń saqtalýyn jáne tıimdi jumys isteýin qamtamasyz etýge múmkindik beredi.
- Qazaqstannyń Marrakesh shartyna qosylýy kórý qabileti boıynsha múgedektigi bar adamdarǵa arnalǵan kitaptarǵa, jýrnaldarǵa, oqý materıaldardy emin-erkin alýyn keńeıtýge, qoǵamnyń mádenı ári áleýmettik ómirine aralasýdy qamtamasyz etýge jáne qolaıly formattarda jasalǵan týyndylarmen halyqaralyq almasýdy júzege asyrýǵa múmkindik jasaıdy. Jalpy, bul uzaq ýaqyt boıy kitaptar men bilimge qol jetkizý quqyǵy úshin kúresip kele jatqan baspa aqparatyn qabyldaý qabileti shekteýli adamdardy qoldaý baǵytynda óte mańyzdy halyqaralyq shart sanalady. Sharttyń normalary Qazaqstan Respýblıkasynyń Konstıtýtsııasy men qoldanystaǵy zańnamasyna, onyń ishinde adam quqyqtary men bostandyqtaryn saqtaýǵa qatysty normalarǵa qaıshy kelmeıdi, - dedi depýtat.
Buǵan deıin habarlanǵandaı, jaqynda Berdibek Soqpaqbaevtyń zaǵıp jandarǵa arnalǵan kitabynyń tusaýkeseri ótti.