Senat mobıldik qosymshany iske qosty
«Barshaǵa Android jáne IOS tuǵyrnamalarynda Senate mobıldik qosymshasynyń iske qosylǵany týraly qýana habarlaımyz. Senate mobıldik qosymshasy bizben yńǵaıly ári ońaı qarym-qatynas ornatý úshin jasaldy. Bul Qazaqstan Respýblıkasy Parlamenti Senatyndaǵy oqıǵalardy bilgisi keletin ári ýaqytty baǵalaıtyn jandarǵa arnalǵan mobıldik qosymsha. Sondaı-aq Senattyń is-sharalaryn kórýge, otyrystardyń stenogrammalaryn oqýǵa, palataǵa kelip túsken zań jobalary týraly bilýge, depýtattardyń memlekettik organdarǵa saýaldary týraly aqparat alýǵa múmkindik bar», - delingen palatanyń baspasóz qyzmeti taratqan málimette.
Senate qosymshasyn AppStore (iPhone) nemese Play market-ten (Android úshin) júkteýge bolady.
«Bul qyzmettiń odan ári jetildirile beretinin de aıtqymyz keledi. Sondyqtan bul ázirge synaq retinde iske qosylyp otyr», - dep atalyp ótken habarlamada.
