Senat menshik quqyǵyn qorǵaýdy kúsheıtý týraly qujatty qabyldady
ASTANA. QazAqparat - Parlament Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine menshik quqyǵyn qorǵaýdy kúsheıtý, tórelik, sot júktemesin ońtaılandyrý jáne qylmystyq zańnamany odan ári izgilendirý máseleleri boıynsha ózgerister men tolyqtyrýlar engizý týraly» Zańy eki oqylymda qabyldandy, dep habarlaıdy QazAqparat.
Zań jobasy túzetýlerdiń tórt tobyn qamtıdy. Birinshisi banktik qaryz sharttary boıynsha túzetýlerdi eskergen. Mysaly, bankterge, kásipkerlik qyzmetpen baılanysty emes banktik qaryz berý sharttary boıynsha, sondaı-aq banktik shotqa qaryzdy esepteýge, banktik shotty júrgizgeni úshin komıssııa belgileýge jáne alýǵa shekteý qoıý kózdeledi. Atalǵan operatsııalar nesıeleý protsesiniń quramdas bóligi bolyp sanalady. Sondyqtan olar boıynsha jeke tulǵalardan qosymsha komıssııalar alynbaýy tıis. Jeke tulǵa bolyp sanalatyn qaryz alýshynyń beresheginiń jasandy ulǵaıýyn bolǵyzbaý úshin olardyń jyljymaıtyn múlik ıpotekalyq sharttary boıynsha alty aılyq merzim ótkizilip alǵannan keıin banktik paıyzdardyń eseptelýin toqtata turý usynylady.
«Ekinshi top jer ýchaskelerin memleket muqtajy úshin májbúrlep alyp qoıýǵa qatysty túzetýlerdi qamtıdy. Atap aıtqanda, jer ýchaskelerin memleket muqtajy úshin májbúrlep alyp qoıýǵa onyń naryqtyq baǵa qunymen nemese basqa da jer ýchaskesin berý sharty saqtalǵan kezde ǵana jol berý usynylyp otyr. Úshinshi top múlikti tárkileý kezinde zańdylyqty qamtamasyz etý máselesine baǵyttalǵan. Mysaly, prokýrordyń quzyretine zerdeleýge jatatyn máselelerdiń tizbesine yqtımal tárkileý úshin negiz bolyp tabylatyn múlik «qylmyspen baılanysty ma, álde joq pa» degen máseleni qarastyrý usynylady. Sondaı-aq, sot keńesý bólmesinde úkim shyǵarý kezinde múliktiń tárkileýge jatatyndyǵy dáleldengenin nemese dáleldenbegenin sheshetin bolady. Buǵan qosa, sottyń múlikti tárkileý túrindegi jazany taǵaıyndaý kezinde úkimde naqty qandaı múliktiń tárkilenýge jatatynyn belgileý kózdeledi», - dedi Ádilet mınıstri Beketaev.
Al tórtinshi top muragerlik, notarıat, jaýapkershiligi shekteýli seriktestik qatysýshylarynyń úlesterin bólý jáne zańdy talaptardy tirkeýdiń keıbir máseleleri boıynsha túzetýlerdi qamtıdy.
«Zań jobasynyń aıasynda Elbasynyń 2018 jylǵy 5 qazandaǵy joldaýyn iske asyrýǵa baǵyttalǵan zańnamalyq usynystar da bar. Ol salyq buzýshylyqtar úshin qylmystyq jaýapkershiliktiń shegin arttyrýdy, ekonomıkalyq qylmystardy izgilendirýdi jáne sot júktemesin tómendetýdi kózdeıtin túzetýler», - dedi vedomstvo basshysy.
