Senat memorgan basshylarynyń jaýapkershiligin kúsheıtetin zańdy qabyldady
Zań jobasy retteletin salalarda sheshimder qabyldaý kezinde ortalyq jáne jergilikti atqarýshy organdardyń jaýapkershiligi men jedeldigin arttyrý arqyly memlekettik basqarý deńgeıleri arasyndaǵy ókilettikterdi ortalyqsyzdandyrý jónindegi ákimshilik reformany iske asyrý maqsatynda ázirlendi.
Sonymen qatar palata depýtattary «Qazaqstan Respýblıkasynyń keıbir zańnamalyq aktilerine Qazaqstan Respýblıkasynyń ákimshilik reformasy máseleleri boıynsha ózgerister men tolyqtyrýlar engizý týraly» Zańyn qabyldady.
Naqty aıtqanda, Úkimettiń qurylymdyq jáne ınvestıtsııalyq saıasatty júzege asyrý, mádenıetti, bilim berýdi, densaýlyq saqtaýdy, týrızm men sportty damytý jónindegi memlekettik saıasatty qalyptastyrý, sondaı-aq, Premer-Mınıstr Keńsesiniń Úkimet apparatyna aınalýyna baılanysty jáne taǵy basqa quzyretteri alynyp tastalady. Zań arqyly ortalyq memlekettik organdardan jergilikti atqarýshy organdarǵa jergilikti mańyzy bar máselelerdi sheshýge baǵyttalǵan 21 fýnktsııa beriledi.
Depýtattardyń aıtýynsha, qabyldanǵan zańdar retteletin salalarda sheshim qabyldaýda ortalyq memlekettik organdardyń ıkemdiligin, jedeldigin jáne derbestigin arttyrýǵa múmkindik beredi. Sol arqyly memlekettik basqarýdyń derbestigi jáne memlekettik organdar basshylarynyń jeke jaýapkershiligi kúsheıtiledi.
Budan buryn habarlanǵandaı, Senattyń jalpy otyrysynda «Qazaqstan Respýblıkasynyń keıbir konstıtýtsııalyq zańdaryna Qazaqstan Respýblıkasynyń ákimshilik reformasy máseleleri boıynsha ózgerister men tolyqtyrýlar engizý týraly» Konstıtýtsııalyq zańynyń jobasy men ilespe qujat birinshi oqylymda maquldandy.
Eske salaıyq, jyldyń basynda Memleket basshysy Qasym-Jomart Toqaev Qazaqstan Respýblıkasynyń memlekettik basqarý júıesin odan ári jetildirý jónindegi sharalar týraly Jarlyqqa qol qoıdy. Oǵan sáıkes, «Qazaqstan Respýblıkasy Premer-Mınıstriniń Keńsesi» memlekettik mekemesi «Qazaqstan Respýblıkasy Úkimetiniń Apparaty» memlekettik mekemesi bolyp qaıta quryldy.
