Senat «Memlekettik statıstıka týraly» zań jobasyn Májiliske qaıtardy

Qujatqa birqatar ózgerister engizilgendikten zań jobasy Májiliske qaıtaryldy, dep habarlaıdy QazAqparat.

Atalǵan zań jobasynyń negizgi maqsaty respondentterdiń júktemesin azaıtý jáne statıstıkalyq aqparatty paıdalanýshylardyń senim deńgeıin, statıstıkalyq aqparattyń búkpesiz ashyqtyǵyn arttyrý bolyp tabylady. Sonymen birge, qujatta memlekettik organdardyń, respondentterdiń jáne memlekettik statıstıkany paıdalanýshylardyń quqyqtary men mindetterin tıimdi bólý, respondentter beretin bastapqy statıstıkalyq derekterdiń qupııalylyǵyn qamtamasyz etý sharalary qarastyrylyp otyr. Budan basqa zań jobasy halyqtyń, bıznestiń, memlekettik organdardyń jáne halyqaralyq uıymdardyń sapaly statıstıkalyq aqparatqa degen suranysyn qanaǵattandyrýǵa baǵyttalady.

Qujat sondaı-aq statıstıkalyq jáne statıstıkalyq emes qyzmetterdiń arajigin ajyratýdy kózdeıdi. Bul rette statıstıkalyq qyzmetti statıstıkalyq jumystar josparynyń sheginde ýákiletti organ men memlekettik organdar jáne Ulttyq bank júzege asyrady. Al statıstıkalyq emes qyzmetti strategııalyq retteýshi, iske asyrýshy fýnktsııalaryn júrgizý aıasyndaǵy memlekettik organdar júzege asyrady. Zań jobasynda barlyq memlekettik organdardyń eseptiligin retteý sharalary da kózdelip otyr. Jalpy qujat BUU-nyń resmı statıstıkanyń negizgi qaǵıdattaryn ornyqtyrýǵa baǵyttalyp, halyqaralyq talaptarǵa sáıkestigin arttyrady.

Májilis maquldaǵan zań jobasyna senatorlar tarapynan birqatar baǵyttar boıynsha ózgerister men tolyqtyrýlar engizildi. Atap aıtqanda, qujattaǵy «úı sharýashylyǵy» uǵymynyń anyqtamasy jańa redaktsııada jazyldy. Budan bólek Senat «Qazaqstan Respýblıkasynyń sottary aktilerin shyǵarǵan kezde alǵashqy statıstıkalyq derekter dáleldeme bola almaıtyny týraly» normany alyp tastady.

Osyndaı túzetýlerden keıin zań jobasy Parlament Májilisine keri qaıtaryldy.