Senat memlekettik shekarany qorǵaýdy kúsheıtýdi usynady
NUR-SULTAN. QazAqparat - Senatta Halyqaralyq qatynastar, qorǵanys jáne qaýipsizdikkomıtetiniń keńeıtilgen otyrysy boldy, onda depýtattar «Qazaqstan Respýblıkasynyń keıbir zańnamalyq aktilerine Qazaqstan Respýblıkasynyń Memlekettik shekarasyn kúzetý jáne ulttyq qaýipsizdik máseleleri boıynsha ózgerister men tolyqtyrýlar engizý týraly» zań jobasyn talqylady. Bul týraly QazAqparat joǵary palatanyń baspasóz qyzmetine silteme jasap habarlaıdy.
Komıtet tóraǵasy Muhtar Qul-Muhammed zań jobasynyń negizgi mindetimemlekettik shekarany qorǵaýdyń qoldanystaǵy júıesiniń tıimdiligi menulttyq qaýipsizdik organdarynyń fýnktsıonaldyq múmkindikterin arttyrý ekenin aıtty.
Parlament depýtattarynyń bastamasymen ázirlengen zań jobasy boıynsha senator Nurjan Nursıpatov áriptesteriniń atynan baıandama jasady. Ol bir kodekske jáne jıyrma bes zańǵa túzetýler engizý usynylyp otyrǵanyn aıtty.
«Shekara qyzmetiniń áskerı basqarý organdarynyń qurylymy túbegeıli jańartyldy. Eger buryn áskerı sıpaty basym bolsa, endi ony aýmaqtyq ulttyq qaýipsizdik organdarymen tyǵyz kiriktirý kózdelip otyr», - dep atap ótti senator Nurjan Nursıpatov.
Senat depýtaty Sergeı Ershov qosymsha baıandama jasady. Onyń pikirinshe, zań jobasyn qabyldaý ulttyq qaýipsizdik organdarynyń basqarý qyzmetin ońtaılandyrýǵa, sondaı-aq ınfraqurylymdy damytý men arnaıy tehnıkalyq quraldardy paıdalaný arqyly memlekettik shekarany qorǵaý jáne kúzetý júıesin jetildirýge múmkindik beredi.
Depýtattar zań jobasyn biraýyzdan qoldap, ony Palatanyń qaraýyna engizýdi usyndy.
Sondaı-aq senatorlar UQK tóraǵasynyń orynbasary Darhan Dilmanovpen jáne ındýstrııa jáne ınfraqurylymdyq damý mınıstriniń orynbasary Berik Kamalıevpen shekaralyq ótkizý pýnktterin damytý men jańǵyrtý máselelerin talqylady.
Senatorlarǵa jalpy shekarada 51 avtomobıl ótkizý beketi bar ekeni, Qazaqstan-Reseı memlekettik shekarasynda ornalasqan olardyń 27-si qaıta jańartýdy talap etetini aıtyldy. Bul beketterdi 2025 jylǵa deıin 5 kezeńde jańǵyrtý usynylyp otyr.
Senatorlar salalyq memlekettik organdardyń ókilderine qashan kólik keptelisiniń azaıatyny, tranzıt áleýetiniń ulǵaıatyny jáne shekarada qolaıly jaǵdaılar jasalatyny týraly qazaqstandyqtardy tolǵandyryp otyrǵan
suraqtardy qoıdy.
Otyrys qorytyndysy boıynsha Senat depýtattary shekara zastavalarynyń materıaldyq-tehnıkalyq bóligin jaqsartý jóninde usynymdar toptamasyn ázirledi. Osy usynystardyń barlyǵy salalyq memlekettik organdar men ulttyq qaýipsizdik organyna jiberiletin bolady.
