Senat memlekettik organdardyń quzyretterin aıqyndaýǵa qatysty shekteýdi joıýǵa baǵyttalǵan zań jobasyn Májiliske qaıtardy
ANA. 31 naýryz. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine ýákiletti memlekettik
organdar men Qazaqstan Respýblıkasy Úkimetiniń tekseriletin sýbektilerge qoıylatyn talaptardy belgileıtin normatıvtik quqyqtyq aktilerdi qabyldaý quzyretterin qaıta qaraý máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda talqylady.
Zań jobasyna 87 túzetý engizgen senatorlar qujatty Májiliske joldady. Esterińizge sala keteıik, atalǵan zań jobasy Memleket basshysynyń Úkimet pen basqa da memlekettik organdardyń quzyretterin aıqyndaý jónindegi ókilettikterin shekteýdi joıý maqsatynda ázirlengen. Sonymen birge, qujat qoldanystaǵy zańnamalardy «Qazaqstan Respýblıkasynyń keıbir zańnamalyq aktilerine jeke kásipkerlik máseleleri boıynsha ózgerister men tolyqtyrýlar engizý týraly» 2009 jylǵy 17 shildedegi Qazaqstan Respýblıkasynyń Zańymen engizilgen túzetýlerge sáıkes keltirýdi qarastyrady. Atap aıtqanda, «Jeke kásipkerlik týraly» zańǵa sáıkes memlekettik organdarǵa keıbir normatıvtik quqyqtyq aktilerdi qospaǵanda, jeke kásipkerlik sýbektilerine tekserý júrgizý tártibi máseleleri boıynsha zańǵa táýeldi normatıvtik quqyqtyq aktiler qabyldaýǵa tyıym salynady. Qazirgi ýaqytta «Jeke kásipkerlik týraly» Zańnyń joǵaryda atalǵan talaptaryna qaramastan, keıbir zańdarda kórsetilgen aktilerdi bekitý boıynsha ýákiletti organdardyń quzyretteri bar. Budan basqa «Jeke kásipkerlik týraly» Zańnyń 37-1-babynyń jańa redaktsııasy jeke kásipkerlik sýbektilerine qoıylatyn talaptardy belgileıtin aktilerdiń (zańdar, Úkimet qaýlylary) tizbesin shekteıdi. Sonymen qatar atalǵan zań jobasymen Memleket basshysynyń Úkimet pen basqa da memlekettik organdardyń quzyretterin aıqyndaý jónindegi ókilettikterin shekteýdi joıatyn túzetýler engiziledi.
Ekinshi oqylymǵa ázirleý barysynda joǵary palata depýtattary jalpy sany 120 usynys jasaǵan bolatyn. Sonyń 87-isi qabyldanyp, zań jobasy Májiliske jiberildi.
