Senat memlekettik materıaldyq rezerv týraly zań jobasyn Májiliske qaıtardy
A. Jeltoqsannyń 24-i. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda «QR keıbir zańnamalyq aktilerine memlekettik materıaldyq rezerv máseleleri boıynsha ózgerister men tolyqtyrýlar engizý týraly» zań jobasy talqylanyp, qujat Májiliske qaıtaryldy,
dep habarlaıdy QazAqparat.
Atalǵan qujattyń negizgi maqsaty «Memlekettik materıaldyq rezerv týraly» jáne «Memlekettik qupııalar týraly» qoldanystaǵy zańnamalardy memlekettik materıaldyq rezerv júıesin damytýdyń tujyrymdamalyq kózqarastaryna sáıkestendirý, sondaı-aq quqyqtyq olqylyqtardyń ornyn toltyrý bolyp tabylady. Máselen, «Memlekettik qupııalar týraly» zańyndaǵy málimetterden qupııalandyrýǵa, ornalastyrýǵa jatatyn materıaldyq qundylyqtardy saqtaý jónindegi baptar alyp tastalynady. Tótenshe jaǵdaılar mınıstri Vladımır Bojkonyń aıtýynsha, bundaı ózgertýler áleýetti ónim berýshiler tobyn ulǵaıtýǵa, taýar baǵasyna ońdy yqpal etýge, materıaldyq qundylyqtardy ýaqtyly shyǵarýǵa septigin tıgizetin bolady.
«Zań jobasy - gýmanıtarlyq kómekter men birinshi kezektegi is-sharalar kórsetý kezinde jedel materıaldyq rezervten materıaldyq qundylyqtardy paıdalaný máselelerin de qamtıdy. Bul rette tabıǵı jáne tehnogendik sıpattaǵy tótenshe jaǵdaılardyń saldarymen kúreste shapshań áreket etý sharalary qarastyrylyp otyr. Budan basqa, memlekettik materıaldyq rezerv salasy boıynsha ýákiletti organnyń quziretin arttyrý qarastyrylady. Atap aıtqanda, atalmysh organǵa «bronnan shyǵarylǵan» materıaldyq qundylyqtardy memlekettik rezervti tolyqtyrý maqsatynda aýdarý sheshimin qabyldaý quqyǵy beriledi. Bundaı shara bıýdjettik qarajattardy tıimdi únemdeýge múmkindik týǵyzady», dedi zań boıynsha baıandaǵan mınıstr Vladımır Bojko.
Parlament Senaty Májilis maquldaǵan zań jobasyn talqylaý barysynda birqatar túzetýler engizdi. Atap aıtqanda, joǵary palata depýtattary qujatta paıdalanylatyn termınologııanyń birizdiligin, normalardyń ishki úılesimin qamtamasyz etýge qatysty ózgerister engizgen. Budan basqa, zań jobasyndaǵy Úkimet quzireti men osy saladaǵy ortalyq atqarýshy organdardyń ókilettigi memlekettik basqarýdy uıymdastyrý máseleleri boıynsha jańa ókilettiktermen tolyǵa tústi.
