Senat Memlekettik baqylaý jáne qadaǵalaý týraly zań jobasyn Májiliske qaıtardy
ASTANA. 10 jeltoqsan. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda palata depýtattary Qazaqstan Respýblıkasyndaǵy memlekettik baqylaý jáne qadaǵalaý týraly zań jobasyn talqylady. Qujatqa birqatar ózgerister engizilgendikten zań jobasy Májiliske qaıtaryldy.
Esterińizge sala keteıik, zań jobasy memleket basshysynyń 2008 jylǵy 6 qarashadaǵy Sybaılas jemqorlyqqa qarsy forýmda júktegen tapsyrmasyn oryndaý maqsatynda ázirlenip otyr. Bul rette zań jobasymen memlekettik organdardyń baqylaýshylyq-qadaǵalaýshylyq qyzmetin júzege asyrý máselelerin jalpy retteý jáne onyń negizgi prıntsıpterin bekitý úshin biryńǵaı quqyqtyq negiz qalyptastyrý kózdeledi. Sonymen qatar quqyqtyq retteýdiń belgilegen salalarynyń ózindik erekshelikterin eskere otyryp, baqylaý-qadaǵalaý júrgizýdi salalyq zańnamalyq aktilerde qaldyrý usynylady.
Máselen, zań jobasynyń kúshi prokýratýra júzege asyratyn qylmystyq is boıynsha sotqa deıingi is júrgizý, jedel izdestirý qyzmeti barysyndaǵy baqylaý men qadaǵalaýǵa, memlekettik qupııalar týraly zańnama talaptarynyń saqtalýyn baqylaýǵa, ınvestıtsııalardy júzege asyrýǵa arnalǵan kelisimsharttar talaptarynyń saqtalýyn baqylaýǵa baılanysty qoldanylmaıtyn bolady. Budan basqa, zań jobasymen tekseriletin sýbektilerdi táýekeli joǵary, ortasha nemese bolmashy toptarǵa jatqyzǵan kezde josparly tekserýler júrgizýdiń kezeńdiligi aıqyndalady. Baqylaý, qadaǵalaý júrgizý kezinde memlekettik organdardyń laýazymdy adamdarynyń tekseriletin sýbektilerdiń quqyqtary men mindetteri belgilenedi.
Qujatty talqylaý barysynda Senat tarapynan birqatar túzetýler engizildi. Atap aıtqanda, joǵarǵy palata depýtattary zań normasyndaǵy qate silteme jasaýǵa jol berilgen tarmaqshalardy alyp tastaýdy usynady.
