Senat memqyzmetti klıentke baǵdarlanǵan modelge kóshirýdi kózdeıtin zańdy pysyqtaıdy
ASTANA. KAZINFORM – Búgin Senattyń jalpy otyrysy ótedi. Onda palata depýtattary memlekettik qyzmetti servıstik jáne klıentke baǵdarlanǵan qaǵıdattarǵa negizdelgen modelge kóshirýdi kózdeıtin qujatty talqyǵa salady.
Esterińizge sala ketsek, senator talqylǵa salǵaly otyrǵan «Qazaqstan Respýblıkasynyń memlekettik qyzmeti týraly» Zań men oǵan ilespe «Qazaqstan Respýblıkasynyń keıbir zańnamalyq aktilerine memlekettik qyzmet máseleleri boıynsha ózgerister men tolyqtyrýlar engizý týraly» qujat 8 sáýirde ótken Májilistiń jalpy otyrysynda ekinshi oqylymda qabyldanǵan edi.
Májilistiń Zańnama jáne sot-quqyqtyq reforma komıtetiniń málimetine qaraǵanda, qujattyń negizgi mindetteriniń biri — servıstik jáne klıentke baǵdarlaný qaǵıdattaryna negizdelgen memlekettik qyzmet modeline kóshý, memlekettik apparatty kásibılendirýdi, sondaı-aq HR-protsesterdi tsıfrlandyrýdy qamtamasyz etý.
– Zańda memlekettik qyzmettiń tartymdylyǵyn arttyrýǵa, sondaı-aq bilikti kadrlardy tartýǵa jáne ustap qalýǵa baǵyttalǵan birqatar shara kózdelgen. Onyń ishinde bir laýazym aıasynda mansaptyq ósýdiń deńgeıles tetigin engizý, ol eńbekaqy tóleý júıesimen úılestiriledi. «B» korpýsynyń bir memlekettik ákimshilik laýazymy aıasynda laýazymdyq deńgeıler belgilenetin bolady, tıisinshe árbir deńgeı úshin laýazymdyq jalaqynyń mólsheri belgilenedi. Pılottyq joba Memlekettik qyzmet isteri agenttiginde, Ádilet jáne Ulttyq ekonomıka mınıstrlikterinde, Astana qalasynyń jáne Atyraý oblysynyń ákimdikterinde 2 jylǵa engiziledi, - delingen komıtet aqparatynda.
Sonymen qatar:
– Úkimet aıqyndaıtyn tártippen memlekettik qyzmetshilerdiń jalaqylaryn keminde úsh jylda bir ret ındeksteý tetigin belgileý;
– qyzmet boıynsha bir eldi mekennen ekinshi eldi mekenge aýysqan ne memlekettik organnyń orny aýystyrylǵan jaǵdaıda turǵyn úı tólemderin, kóterme járdemaqyny, olardyń múlkin tasymaldaýǵa jumsalǵan shyǵystardyń ótemaqysyn berý;
– rotatsııalanǵan, orny aýystyrylǵan nemese basqa eldi mekenge aýystyrylǵan memlekettik qyzmetshilerdiń balalaryn balabaqshalarǵa kezekten tys qabyldaý;
– memlekettik qyzmetshilerdi turǵyn úımen qamtamasyz etý úshin ázirlengen jeńildetilgen turǵyn úı baǵdarlamalaryna qatysý;
– memlekettik qyzmet ótili 25 jyldan kem emes, memlekettik nagradamen nemese ýákiletti organnyń vedomstvolyq nagradasymen nagradtalǵan memlekettik qyzmetshi zeınetke shyqqan kezde oǵan tórt laýazymdyq aılyqaqy mólsherinde birjolǵy aqshalaı syıaqy berý;
– ústeme jumys ýaqytynda, demalys jáne mereke kúnderi jumys istegeni úshin ótemaqy kepildikterin belgileý;
– memlekettik qyzmetshige mindetti túrde demalys kestesine sáıkes jyl saıynǵy eńbek demalysyn berý;
– memlekettik qyzmet ótiline baılanysty aqy tólenetin qosymsha demalys kúnderin, sondaı-aq qysqa merzimdi demalys berý qarastyrylǵan.
Munymen qosa, memlekettik qyzmetshiniń jumys ýaqytynyń rejımi reglamenttelgen. Kúndelikti jumystyń uzaqtyǵy segiz saǵatqa deıin belgilenedi. Qalypty jumys ýaqyty aptasyna 40 saǵattan aspaýǵa tıis. Birinshi jáne ekinshi toptardaǵy múgedektigi bar memlekettik qyzmetshilerge aptasyna 36 saǵattan aspaıtyn jumys ýaqytynyń qysqartylǵan uzaqtyǵy belgilenedi. Júkti áıeldiń, úsh jasqa deıingi balasy (balalary) bar ata-analardyń biriniń, sondaı-aq medıtsınalyq qorytyndyǵa sáıkes otbasynyń naýqas múshesine kútim jasaýdy júzege asyratyn memlekettik qyzmetshiniń jazbasha ótinishi boıynsha olarǵa tolyq emes jumys ýaqyty rejımi belgilenedi.
Aıta keteıik, palatanyń ótken aptadaǵy otyrysynda «Qazaqstan Respýblıkasy men Halyqaralyq Valıýta Qory arasyndaǵy Kavkaz, Ortalyq Azııa jáne Mońǵolııa úshin óńirlik áleýetti damytý ortalyǵyna qatysty ózara túsinistik týraly memorandýmdy ratıfıkatsııalaý týraly» Zań qaralyp, maquldandy.
Sol kezde Senator Serik Óteshov bul memorandýmdy ratıfıkatsııalaýdyń qandaı mańyzy bar ekenin aıtqan edi.
– Qujat Almaty qalasynda Kavkaz, Ortalyq Azııa jáne Mońǵolııa úshin Halyqaralyq Valıýta Qorynyń óńirlik ortalyǵynyń tolyqqandy jumys isteýi úshin qajetti quqyqtyq negiz qalyptastyrady. Ortalyqtyń bizdiń elimizde ornalasýy Qazaqstannyń aımaqtaǵy qarjylyq bilim men quzyretterdiń negizgi haby retindegi rólin nyǵaıtyp, memleketimizdiń halyqaralyq bedelin arttyrady, - dedi ol.
Atalǵan óńirlik ortalyq Qazaqstan, Armenııa, Ázerbaıjan, Grýzııa, Qyrǵyzstan, Mońǵolııa, Tájikstan, Túrikmenstan, Ózbekstan sııaqty 9 elge Halyqaralyq valıýta qorynyń qyzmetin kórsetedi.
Sondaı-aq senatorlar «Qazaqstan Respýblıkasynyń Úkimeti men Túrkııa Respýblıkasynyń Úkimeti arasyndaǵy Qazaqstan Respýblıkasy men Túrkııa Respýblıkasynyń áýe keńistigi arqyly áskerı múlik pen personaldy tranzıtteý týraly kelisimdi ratıfıkatsııalaý týraly» Zańdy maquldady.
Qujatty tanystyrǵan senator Darhan Qydyráli kelisimge 2024 jyly qol qoıylǵanyn eske saldy.
– Kelisim Qazaqstan Respýblıkasyna BUU-nyń bitimgershilik mıssııalary sheńberinde belgilengen jerlerge jetý úshin Túrkııa áýe keńistigin júıeli túrde paıdalanýǵa múmkindik beredi, - dedi ol.
Depýtat «Ulttyq qaýipsizdik týraly» Zańda Qazaqstan aýmaǵy arqyly shet memlekettiń áskerı qurylymdaryn, qarý-jaraǵy men áskerı tehnıkasyn tranzıtteýge arnaıy kelisimder men ruqsattar arqyly ǵana jol beriletinin aıtty.
Jalpy otyrystyń kún tártibine shyǵarylǵan máseleler qaralyp bolǵannan keıin senatorlar depýtattyq saýaldaryn joldady. Atap aıtqanda, Andreı Lýkın balalar úıleriniń túlekterin turǵyn úımen qamtamasyz etý máselesinde júıeli problemalardyń bar ekenine toqtaldy. Ol Úkimetke naqty ındıkatorlar men jaýapty tulǵalar aıqyndalǵan Jol kartasyn ázirleýdi jáne qajetti ózgeristerdi zańnamalyq deńgeıde bekitýdi usyndy. Al Alısher Satvaldıev óńirlerdegi aýyl sharýashylyǵy salasynyń problemalaryna júrgizilgen keshendi taldaýǵa nazar aýdaryp, agroónerkásip keshenin reformalaýǵa arnalǵan strategııalyq bastamalar toptamasyna bastamashylyq jasady. Atalǵan usynystar sharýalarǵa memlekettik qoldaý kórsetýdi kúsheıtýge, tehnıkalyq bazany jańǵyrtýǵa jáne agrarlyq sektordyń ósýine kedergi keltiretin tosqaýyldardy joıýǵa baǵyttalǵan.
