Senat memqyzmetkerlerdi jeke múddelerin deklaratsııalaýǵa mindetteıtin zańdy maquldady
ASTANA. KAZINFORM – Senat depýtattary «Qazaqstan zańnamasyna sybaılas jemqorlyqqa qarsy is-qımyl máseleleri boıynsha ózgerister men tolyqtyrýlar engizetin zań men oǵan ilespe qujatty eki oqylymda maquldady.
Qujattardy tanystyrǵan senator Andreı Lýkın bul zań eń áýeli Qylmystyq kodeksti jetildirip, múddeler qaqtyǵys deıtin uǵymdy naqtylaı túsetinin aıtty.
- Túzetýler aıasynda múddeler qaqtyǵysynyń aldyn alý jáne ony retteý tetikteri engizilip, ózara baılanysty tulǵalardyń tizbesi keńeıtiledi, jeke múddelerdi deklaratsııalaý mindeti belgilenedi. Sondaı-aq múddeler qaqtyǵysynyń aldyn alý sharalaryn qabyldamaǵany úshin jaýapkershilik kózdeledi.
Memlekettik organdar men kvazımemlekettik sektor sýbektilerinde tsıfrlyq kadrlyq júıeni engizý, kadrlyq protsesterdi jetildirý, sybaılas jemqorlyqqa qarsy komplaens-qyzmetterdiń táýelsizdigin kúsheıtý, turmystyq sybaılas jemqorlyqqa qarsy is-qımyl tetikterin jetildirý jónindegi sharalar qarastyrylady, - dedi senator.
Onyń aıtýynsha, jańa zań memlekettik fýnktsııalardy oryndaýǵa ýákiletti adamdarǵa teńestirilgen tulǵalar tobyn keńeıtetinin aıtty.
- Jaqyn týystar men ózge de baılanysty tulǵalardyń birlesip qyzmet atqarýyna qatysty shekteýler kúsheıtiledi. Sondaı-aq ishki sybaılas jemqorlyqqa qarsy baqylaý tetikteri jańǵyrtylady, - dedi Andreı Lýkın.
Atalǵan qujattarda para ýáde etkenderdi de jazalaý qarastyrylǵan.
- Bul jerde para ýáde etý sáti laýazymdy tulǵaǵa aýyzsha málimdeme túrinde de, jazbasha habarlamalar arqyly da, onyń ishinde áleýmettik jeli men ınternet habarlamamen joldanǵan ýádeler arqyly da tirkele alady. Sot praktıkasy zań buzý faktisin dáleldeýdiń bazalyq prıntsıpterine súıenedi dep topshylap otyrmyz, — deıdi Memlekettik qyzmet ister jónindegi agenttik tóraǵasynyń orynbasary Salaýat Syılybaıuly.
Sondaı-aq, bul jańashyldyqtar memlekettik qyzmetkerlerdiń týystaryn qyzmetke alýyna baılanysty shekteýlerdi kúsheıtedi.
