Senat Medıatsııa ınstıtýtyn engizýdi kózdeıtin zań jobasyn Májiliske qaıtardy
ASTANA. 28 jeltoqsan. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda palata depýtattary «Medıatsııa týraly» zań jobasyn qarap, oǵan birqatar ózgerister engizip Májiliske qaıtardy. Atalǵan zań jobasy boıynsha janjaldy sheshýdiń balama tásili - bitimgershilik - medıatsııa ınstıtýtyn engizý kózdelip otyr.
Atap aıtqanda, elimizdiń 2020 jylǵa deıingi kezeńge arnalǵan quqyqtyq saıasat tujyrymdamasynda azamattyq sot isin júrgizýge qatysýshylardyń quqyqtaryn barynsha iske asyrý, jeke adamnyń buzylǵan quqyqtary men bostandyqtaryn, qoǵam men memleket múddesin ýaqytyly qorǵaý jáne qalpyna keltirý maqsatynda birqatar is-sharalar qamtylǵan bolatyn. Onyń ishinde, jeke quqyqtyq daý-sharlar taraptary arasyndaǵy ymyraǵa qol jetkizýdiń sot jáne sottan tys tártippen qoldanylatyn túrli joldary men ádisterin belgileýge baǵyttalýy múmkin áreketter de kórinis tapqan edi. Osyǵan oraı, zań jobasynda medıatsııa uǵymyn anyqtaý, onyń negizgi qaǵıdattaryn, qoldanylý aıasyn, medıatsııa rásiminiń kepildigin, medıatorlar qyzmetine aqy tóleý jáne belgileý máseleleri qarastyrylady.
Budan bólek, zań jobasy boıynsha daýlardy jeke qarsylyq aıasynan shyǵaryp, múddeli pikirtalas aıasyna berý kózdeledi. Qujat qabyldansa, sottarda qaralatyn isterdiń sany da aıtarlyqtaı azaıatyndyǵy kútiledi.
Májilis maquldaǵan zań jobasyna Senat birqatar túzetýler engizdi. Olardyń basym bóligi redaktsııalyq naqtylaý sıpatynda bolyp otyr.
