Senat Májiliske qaıtarǵan zań jobasyn qaıta qarap, qabyldady
ASTANA. QazAqparat - Búgin Parlament Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine sporttyq jáne sporttyq-buqaralyq, oıyn-saýyq mádenı-buqaralyq is-sharalar ótkizý kezinde qaýipsizdikti qamtamasyz etý máseleleri boıynsha ózgerister men tolyqtyrýlar engizý týraly» QR Zańyn qabyldady.
Eske sala keteıik, atalǵan qujatty Senat eki oqylymda talqylap, birqatar túzetýler engizilgendikten Májiliske qaıtarǵan bolatyn. Alaıda, tómengi palatanyń qyzmeti toqtatylyp, Májilis tarqaǵandyqtan qujatty Senat qaıtadan suratyp alynǵan.
Aıta keterligi, Konstıtýtsııaǵa sáıkes, Májilis ýaqytsha bolmaǵan kezeńde Parlamenttiń zań qabyldaý qyzmetin Senattyń ózi atqara beredi. Osyǵan oraı, jalpy otyrysta joǵary palata atalǵan quqyqty paıdalanyp, zań jobasyn talqylaǵan bolatyn.
Tutastaı alǵanda, atalǵan zań negizinen sporttyq-buqaralyq, mádenı oıyn-saýyq jáne basqa da is-sharalaryn uıymdastyrýǵa, ótkizýge baılanysty quqyqtyq qatynastardy retteýge baǵyttalady. Máselen, ondaı sharalardy ótkizý úshin jergilikti atqarýshy organdar uıymdastyrý komıtetterin quratyn bolady. Olar sharalardy ótkizýge tartylǵan uıymdardyń qyzmetin úılestiredi. Jeke tulǵalardyń mádenıet, dene shynyqtyrý, sport salasyndaǵy quqyqtary men mindetteri aıqyndalyp, olardyń sharalarǵa barýy kezindegi tyıym salýlary men shekteýleri keńeıtiledi. Osyǵan baılanysty jeke tulǵalarǵa atalǵan sharalardaǵy minez-qulyqtyń, júris-turys qaǵıdalaryn buzǵany úshin ákimshilik jaýaptylyq engiziledi.
Budan bólek, buqaralyq sharalar ótkiziletin oryndarǵa alkogol ónimderin, sonymen birge, metall jáne shyny qutydaǵy, pırotehnıkalyq jáne basqa da adam ómiri men densaýlyǵyna qaýip tóndiretin kez kelgen zattar men ónimderdi ákelýge tyıym salynady. Sonymen qatar, sharalar ótkiziletin ýaqytta áleýmettik, násildik, ulttyq, dinı arazdyqty qozdyrýǵa baǵyttalǵan, sol sekildi jeke tulǵalardyń quqyqtaryna nuqsan keltiretin plakattardy, emblemalardy, transparanttardy jáne ózge de kórnekti zattardy paıdalanýǵa tyıym salynady. Bundaı tyıym salýlardy buzǵany úshin jeke tulǵalarǵa jıyrma aılyq eseptik kórsetkish mólsherinde aıyppul salynady, ákimshilik jaýaptylyqqa tartylady.
Parlament qabyldanǵan Zań Memleket basshysynyń qol qoıýyna joldanady.
