Senat Másimovtiń UQK tóraǵasy qyzmetine taǵaıyndalýyna kelisim berdi
ASTANA. QazAqparat - QR Parlamenti Senatynyń jalpy otyrysynda depýtattar Kárim Másimovti Ulttyq qaýipsizdik komıteti tóraǵasy laýazymyna taǵaıyndaýǵa kelisim berdi.
QR Prezıdenti Ákimshiliginiń basshysy Ádilbek Jaqsybekov Memleket basshysynyń Senatqa K.Másimovti UQK Tóraǵasy laýazymyna taǵaıyndaýǵa kelisim berý týraly ótinishin oqyp berdi.
Ashyq daýys berý barysynda 39 senatordyń barlyǵy da bir aýyzdan onyń kandıdatýrasyn qoldady.
Esterińizge sala keteıik, búgin QR Prezıdentiniń «K.Q.Másimovti Qazaqstan Respýblıkasy Ulttyq qaýipsizdik komıtetiniń Tóraǵasy qyzmetine taǵaıyndaý jáne Qazaqstan Respýblıkasynyń Úkimeti týraly» Jarlyǵy jarııalanǵan bolatyn.
«Kárim Qajymqanuly Másimov Qazaqstan Respýblıkasy Ulttyq qaýipsizdik komıtetiniń Tóraǵasy bolyp taǵaıyndalsyn, ol Qazaqstan Respýblıkasynyń Premer-Mınıstri qyzmetinen bosatylsyn. Qazaqstan Respýblıkasynyń Úkimeti Qazaqstan Respýblıkasy Úkimetiniń jańa quramy bekitilgenge deıin óz mindetterin atqaratyn bolsyn. Qazaqstan Respýblıkasy Premer-Mınıstriniń mindetterin ýaqytsha atqarý Qazaqstan Respýblıkasy Premer-Mınıstriniń birinshi orynbasary Baqytjan Ábdiruly Saǵyntaevqa júktelsin», - delingen Jarlyqta.
