Senat Marokko aýmaǵynda jasyrynǵan kúdiktilerdi quryqtaý tártibin maquldady

ASTANA. KAZINFORM — Búgin Senattyń jalpy otyrysynda «Qazaqstan Respýblıkasy men Marokko Koroldigi arasyndaǵy ustap berý týraly kelisimdi ratıfıkatsııalaý týraly» Zańy maquldandy.

- Qujat taraptardyń suraý salýy negizinde qylmystyq qýdalaý júrgizý nemese sottyń úkimin oryndaý maqsatynda izdestirilip jatqan kez kelgen adamdy ustap berý tártibin aıqyndaıdy. Kelisim qylmys jasaǵan adamdar úshin jazanyń bultartpastyǵy qaǵıdatyn qamtamasyz etýge baǵyttalǵan, - dedi senator Murat Qadyrbek.

Onyń aıtýynsha, taraptardyń óz azamattaryn ustap berýge jol berilmeıdi.

- Kelisimdi iske asyrý jazbasha túrde suraý salý negizinde atqarylady. Suraýǵa qatysty qabyldanǵan sheshim týraly aqparatty suratylǵan taraptyń ortalyq organy suratýshy taraptyń ýákiletti organyna dereý habarlaıdy. Atalǵan qujat aıasynda ózara is-qımyl jasaıtyn ortalyq organdar retinde Qazaqstan Respýblıkasynan – Bas prokýratýra, al Marokko Koroldiginen Ádilet mınıstrligi aıqyndalady. Sonymen qatar, qujattyń oryndalýyna baılanysty shyǵystardy óteý tártibi, daýlardy sheshý rásimderi jáne ózge de quqyqtyq normalar kózdelgen, - dedi depýtat.

Zańnyń qabyldanýy Qazaqstan men Marokko aýmaǵynda sot tóreliginen jasyrynǵan adamdardy jaýapkershilikke tartýǵa, Marokko koroldiginde Qazaqstan azamattary quqyqtarynyń qorǵaý kepildikterin kúsheıtýge, qylmystyq sot isin júrgizý salasyndaǵy sharttyq-quqyqtyq bazany tolyqtyrýǵa jáne qylmyspen kúres salasyndaǵy halyqaralyq yntymaqtastyqtyń tıimdiligin arttyrýǵa múmkindik beredi.

Aıta keteıik, buǵan deıin Qazaqstan men Qatar arasynda jasyrynyp júrgen adamdardy ustap berý tártibi aıqyndaldy.