Senat maquldaǵan zań: Ulttyq ǵylym akademııasynyń ǵylymda róli kúsheıedi
ASTANA. KAZINFORM — Búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine ǵylym, ǵylymdy qajetsinetin aýmaqtar, áleýmettik qamsyzdandyrý, bilim berý, densaýlyq saqtaý jáne áskerı qyzmet máseleleri boıynsha ózgerister men tolyqtyrýlar engizý týraly» Zańy eki oqylymda qaralyp, maquldandy.
Zań ǵylymdy damytýdyń tıimdi jáne tutas modelin qalyptastyrýǵa, ǵylymı nátıjelerdi naqty ekonomıkaǵa engizýge jáne eldiń ǵylymı-tehnologııalyq damýyn jańa deńgeıge kóterýge baǵyttalǵan. Sondaı-aq, zań ǵylym, densaýlyq saqtaý, áleýmettik sala jáne áskerı qyzmet máselelerin de qamtyp otyr.
- Birinshiden,zańmen ǵylymdy qajetsinetin aýmaqtardy qalyptastyrý kózdelgen. Atalǵan aýmaqtar ǵylymı qalashyqtar nemese ǵylymı-tehnologııalyq parkter túrinde qurylyp, ǵylym, tehnologııa jáne joǵary tehnologııalyq óndiristerdiń shoǵyrlanýyna múmkindik beredi. Olardyń quqyqtyq mártebesi, basqarý tetikteri, qarjylandyrý kózderi jáne memlekettik qoldaý sharalary naqty aıqyndalǵan. Sonymen qatar salyq boıynsha yntalandyrý, arnaıy ekonomıkalyq aımaq tártibin paıdalaný, memlekettik-jekeshelik áriptestik tetikteri qarastyrylyp, kadrlardy daıarlaýǵa memlekettik tapsyrys ornalastyrý kózdeledi. Ekinshiden, mańyzdy baǵyttardyń biri – ǵylymdy qarjylandyrý júıesin jetildirý. Zańda ǵylymı jobalardy iske asyrýdyń naqty tártibi belgilenip, jobalardyń merzimi shart jasalǵan kúnnen bastap barlyq kezeńderdi tolyq qamtıtyn bolady. Bul ǵylymı jobalardyń turaqty qarjylandyrylýyn qamtamasyz etedi, - dedi senator Altynbek Nýhuly.
Munymen qosa, tájirıbelik-konstrýktorlyq jumystardy qarjylandyrý, halyqaralyq ǵylymı yntymaqtastyq aıasynda birlesken jobalardy qoldaý jáne ǵylymı nátıjelerdi kommertsııalandyrý sharalary kúsheıtiledi. Osynyń nátıjesinde ǵylymı zertteýden bastap ony óndiriske engizýge deıingi tolyq tsıkl qalyptasady. Budan bólek, konkýrstar nátıjelerin jarııalaý merzimderin belgileý, jobalardyń qunyn negizdeý jáne qarjylandyrý kólemderin bekitý tártibin naqtylaý kózdelgen.
- Ǵylymı ınfraqurylymdy damytý jáne tsıfrlandyrý qarastyrylady. Zańda ujymdyq paıdalanylatyn zerthanalar ınstıtýty engiziledi. Bul ǵylymı jabdyqtarǵa teń qoljetimdilikti qamtamasyz etip, ınfraqurylymdy tıimdi paıdalanýǵa jáne artyq shyǵyndardyń aldyn alýǵa múmkindik beredi. Sonymen qatar, stýdentter men jas zertteýshilerge ǵylymı ınfraqurylymdy keńinen paıdalaný múmkindigi beriledi. Bul ǵylymnyń biryńǵaı tsıfrlyq keńistigin qalyptastyrýǵa yqpal etedi, - dedi depýtat.
Ulttyq ǵylym akademııasynyń qyzmetin jetildirý
Zańda Akademııanyń ınstıtýtsıonaldyq turaqtylyǵyn qamtamasyz etýge baǵyttalǵan normalar engizilgen. Atap aıtqanda, onyń múliktik negizderi, basqarý tetikteri jáne strategııalyq zertteýler júrgizý quzyreti naqtylanady.
Zań aıasynda ǵylym máseleleri jónindegi Qazaqstan Respýblıkasy Prezıdentiniń janyndaǵy Ulttyq ǵylym akademııasynyń róli joǵary ǵylymı uıym ári qazaqstandyq ǵylymnyń bolashaǵyn aıqyndaıtyn negizgi ortalyq retinde kúsheıtiledi. Ǵylymnyń jaı-kúıi men damý úrdisteri týraly jyl saıynǵy ulttyq baıandama ázirlenedi. Bul ǵylymdy júıeli túrde josparlaýǵa múmkindik beredi.
Bul zańda ǵalymdardyń mártebesin kúsheıtý jáne áleýmettik kepildikterin keńeıtý eskerilgen. Ǵalymdardyń quqyqtary, akademııalyq erkindigi jáne eńbekaqy tóleýdiń biryńǵaı tásilderi zańnamalyq deńgeıde bekitiledi. Sonymen birge, ǵylymı qyzmetkerlerge beriletin 56 kúndik eńbek demalysyn barlyq ǵylymı uıymdarǵa taratý kózdelgen.
Dárilik zattardy tirkeý
- Zańda densaýlyq saqtaý salasyna qatysty da mańyzdy ózgerister qarastyrylǵan. Atap aıtqanda, dárilik zattardy tirkeý rásimderi ońtaılandyrylyp, kompozıttik memlekettik qyzmet engiziledi. Bul tirkeý merzimin eki eseden astam qysqartýǵa múmkindik beredi. Sondaı-aq, dárilik zattardyń sapasyn baqylaý kúsheıtilip, referens-ortalyqtar qurý arqyly medıtsınalyq kómektiń sapasyn arttyrý kózdelgen, - dedi Altynbek Nýhuly.
Aıta keteıik, zańda uzaq ýaqyt komada jatqan azamattardyń quqyqtaryn qorǵaý maqsatynda olardyń týystaryna múgedektikti rásimdeýge ótinish berý múmkindigi beriledi. Sonymen qatar, saqtandyrý tólemderi men zeınetaqy annýıtetteri boıynsha quqyqtyq qorǵaý sharalary kúsheıtiledi.
Buǵan deıin habarlanǵandaı, QR Prezıdentiniń janyndaǵy Qazaqstan Respýblıkasynyń Ulttyq ǵylym akademııasy álemdik ǵylymı qaýymdastyqpen yntymaqtastyqty nyǵaıtý jolynda mańyzdy qadam jasady.
