Senat maquldaǵan sońǵy zań: notarıýstardyń jaýapkershiligi kúsheıtiledi
ASTANA. KAZINFORM — Búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine notarıattyq qyzmet jáne zań kómegi máseleleri boıynsha ózgerister men tolyqtyrýlar engizý týraly» Zańy eki oqylymda qaralyp, maquldandy.
— Zańnyń maqsaty — notarıat týraly zańnamany jetildirý, notarıattyq qyzmeti salasyndaǵy memlekettik baqylaýdyń tıimdiligin arttyrý, notarıattyq is-áreketterdi jasaý kezinde zańdylyqtyń saqtalýyn qamtamasyz etý jáne notarıattyq qyzmetterdiń sapasyn arttyrýǵa jaǵdaı jasaý, — dedi senator Sovetbek Medebaev.
Zańda mynadaı tujyrymdamalyq erejeler kózdelgen:
— notarıat qyzmetine baqylaýdy Qazaqstan Respýblıkasynyń Kásipkerlik kodeksinen alyp tastap, ony «Notarıat týraly» salalyq Zańda reglamentteý.
— Azamattyq protsestik kodekske memlekettik satyp alý jáne kvazımemlekettik sektordyń satyp alýy týraly sharttar negizinde atqarýshylyq jazbalardy jasaý tek buıryqtyq is júrgizý tártibimen sottar arqyly júzege asyrylatynyn kózdeıtin tolyqtyrý engiziledi. Qazirgi ýaqytta mundaı atqarýshylyq jazbalardy óndirip alý somasyna qaramastan notarıýstar jasaıdy.
— Biryńǵaı notarıattyq aqparattyq júıede atqarýshylyq jazbany jasaý týraly ótinishterdi notarıýstar arasynda avtomatty túrde bólý tetigin engizý kózdeledi.
— Atap aıtqanda, zań qabyldanǵannan keıin, atqarýshylyq jazbany jasaý týraly ótinish notarıýstar arasynda avtomatty túrde bólinetin bolady. Bul tásil atqarýshylyq jazbany jasaý protsesiniń ashyqtyǵyn qamtamasyz etýge, notarıýstar arasyndaǵy júktemeni teń bólýge, sondaı-aq múddelilik pen aldyn ala ýaǵdalastyq (sóz baılasý) faktilerin boldyrmaýǵa baǵyttalǵan. Atqarýshylyq jazbany tek boryshkerdiń (jeke nemese zańdy tulǵanyń) tirkelgen jeri boıynsha jasaý talaby bekitiledi. Munymen qosa, notarıýstardyń lıtsenzııasynyń qoldanylýyn toqtata turý jáne lıtsenzııadan aıyrý negizderin keńeıtý arqyly olardyń jaýapkershiligi kúsheıtiledi, — dedi depýtat.
Onyń aıtýynsha, notarıat ınstıtýtyn tsıfrlandyrý maqsatynda elektrondyq nysandaǵy notarıattyq qujattardy ortalyqtandyrylǵan túrde jınaýǵa, saqtaýǵa jáne esepke alýǵa arnalǵan biryńǵaı notarıattyq tsıfrlyq júıeniń quramdas bóligi retinde notarıattyq tsıfrlyq arhıv týraly norma engiziledi. Sonymen qatar, notarıýstyń jaqyn týystary basshy, quryltaıshy nemese aktsıoner sanalatyn zańdy tulǵalarǵa qatysty notarıattyq is-áreketterdi jasaýǵa shekteýler belgilenedi.
— Respýblıkalyq notarıattyq palatanyń, aýmaqtyq notarıattyq palatalardyń tóraǵalarynyń, sondaı-aq tártiptik komıssııalar tóraǵalary men músheleriniń ókilettik merzimi bir ret qaıta saılaný quqyǵymen tórt jyl bolyp shekteledi. Memleket kepildik bergen zań kómeginiń túrleri advokattar men zań konsýltanttarynyń konstıtýtsııalyq is júrgizýde azamattardyń zańdy múddelerine ókildik etýimen tolyqtyrylady. Bul shara konstıtýtsııalyq is júrgizý aıasynda memleket kepildik bergen zań kómegin kórsetýge múmkindik beredi, — dedi senator.
Buǵan deıin Májilis depýtaty Nursultan Baıtilesov notarıýstarda derbes derekterdi qorǵaý tetikterine qatysty túsinik berdi.
Buǵan deıin habarlanǵandaı, bıyl 1 qyrkúıekten bastap jańa Parlament - Quryltaı óz jumysyna kirisedi.
