Senat «Mádenıet týraly» zań jobasyn Májiliske qaıtardy
ASTANA. Jeltoqsannyń 11-i. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda palata depýtattary «Mádenıet týraly» QR zańyna ózgerister men tolyqtyrýlar engizý týraly» zań jobasyn talqylady, qujatqa birqatar túzetýler engizilgendikten ol Májiliske qaıtaryldy,
dep habarlaıdy QazAqparat.
Atalǵan zań jobasy mádenıet týraly ulttyq zańnamany otandyq kınematografııany, murajaı jáne kitaphana isin qoldaý jáne damytý, sondaı-aq mádenı qundylyqtardy qalyptastyrý men saqtaý bóligin odan ári jetildirý kózdeledi.
«Kınematografııa salasy boıynsha túsiniktemelik apparatqa birqatar jańa uǵymdar engizildi. Buǵan qosa kınematografııa uǵymy da naqtylanyp, kıno sapasyn halyqaralyq standarttarǵa sáıkestendirý maqsatynda kınofılmderdi ındeksatsııalaý júıesi aıqyndalyp otyr. Jobada fılmderdi 6 sanat boıynsha bólý usynylady. Sonymen birge, prokattyq kýálikter berý sharalary da qarastyryldy. Budan basqa, ulttyq kıno uǵymyn aıqyndaýǵa qatysty 4 ólshem anyqtalǵan edi, Senat qabyrǵasyndaǵy talqylaý barysynda bul taǵy bir ólshemmen tolyqty», dedi zań jobasy boıynsha baıandama jasaǵan QR Mádenıet jáne aqparat mınıstrliginiń jaýapty hatshysy Janna Qurmanǵalıeva. Onyń aıtýynsha, zań jobasynyń negizgi jetistigi mádenıet uıymdarynyń eń tómengi memlekettik normatıvi men tıptik úlgi shtattaryn Úkimet qaýlysymen bekitý jónindegi normanyń engizilýi bolyp tabylady. «Buǵan deıin mádenıet uıymdarynyń tıptik úlgi shtattary tek mınıstrdiń buıryǵymen bekitiletin. Sonyń kesirinen mádenıet salasy qajetti mamandarmen, qarajatpen tıisti deńgeıde qamtamasyz etilmeı keledi», dedi J. Qurmanǵalıeva.
Májilis maquldaǵan zań jobasyna senatorlar birqatar túzetýler engizdi. Atap aıtqanda, joǵary palata depýtattary fılmge qatysty prokattyq kýálikti keri qaıtarmaı-aq berý tártibin eskertýdi usynyp otyr. Budan basqa birshama ózgerister naqtylaý jáne redaktsııalyq sıpatta bolyp tabylady.
